ФУТБОЛ. Дастаҳои «Меҳргон», «Динамо», «Пахтакор» ва «Кӯшон» ба Лигаи якуми Тоҷикистон роҳ ёфтанд

ДУШАНБЕ, 01.12.2020. /АМИТ «Ховар»/. Дар варзишгоҳҳои мамлакат  мусобиқа байни дастаҳои Лигаи дуюми Тоҷикистон   ба охир расиданд. Дастаи футболи «Динамо»-и пойтахт дар шаҳри Душанбе, дастаи «Пахтакор» аз ноҳияи Ҷаббор Расулов ​​дар вилотяи Суғд, дастаи «Кӯшон» -и ноҳияи Кӯшониён дар вилояти Хатлон ва дастаи «Меҳргон» -и ноҳияи Нуробод дар минтақаи Рашт ғолиб шуданд. Дар ин бора  шореҳи  варзиши АМИТ «Ховар» Меҳрони  Қурбон бо истинод ба Федератсияи футболи Тоҷикистон иттилоъ медиҳад.

Тибқи низомномаи мусобиқа, байни дастаҳои Лигаи дуюми мамлакат  ғолибони мусобиқаҳои минтақавӣ бояд дар марҳилаи ниҳоӣ рақобат карда, се дастаеро муайян мекарданд, ки соли оянда ҳуқуқи дар Лигаи якуми Тоҷикистон иштирок намудан доранд. Аммо бо сабабҳои хуруҷи пандемияи коронавирус ва мушкилоти молиявии дастаҳо Шӯрои Кумитаи иҷроияи ФФТ қарор кард, ки ҳар чор дастаҳо – «Динамо», «Пахтакор», «Кӯшон»  ва «Меҳргон»  дар сурати гузаштан аз тартиби литсензиякунонӣ ҳақ доранд соли оянда дар Лигаи якуми мамлакат иштирок намоянд.