Nikkei: Барои мубориза бо пандемия ва дастгирии иқтисоди ҷаҳонӣ алакай беш аз 13 триллион доллар сарф шудааст

ДУШАНБЕ, 24.12.2020 /АМИТ «Ховар»/.  Маблағи умумии барои мубориза бо пандемияи COVID-19, рафъи мушкилоти иқтисодии вобаста ба он ва кумак  ба аҳолӣ ҷудошуда  ҳоло дар ҷаҳон аз 13 триллион доллар зиёд шудааст. Тавре АМИТ «Ховар» бо истинод ба ТАСС хабар медиҳад, рӯзномаи Ҷопонии «Nikkei» дар ин бора рӯзи чоршанбе иттилоъ додааст.

Рӯзнома бо истинод ба ҳисобҳои коршиносон  зикр мекунад, ки ин маблағ маҷмӯи тадбирҳои ҳавасмандгардонии иқтисодиётро дар шароити пандемия, инчунин бастаи навакак дар Конгресси ИМА мувофиқашударо ба маблағи тақрибан 900 миллиард доллар, дар бар мегирад.

Қабули барномаҳои нав ба навии ҳавасмандкунии иқтисодиёт, -омадааст дар  «Nikkei » — боиси таварруми қарзи давлатӣ дар кишварҳои пешрафтаи ҷаҳон мегардад. Мувофиқи маълумоти мутахассисон  дар соли 2021 он 125% -и маҷмӯи маҳсулоти дохилии онҳоро ташкил хоҳад кард.

АКС аз сомонаи korrespondent.net