Вазорати кишоварзии Тоҷикистон беш аз 45 ҳазор тонна тухмии гандум захира намудааст

ДУШАНБЕ, 06.12.2020 /АМИТ «Ховар»/. Имсол дар мамлакат дар хоҷагиҳои ҷамъиятӣ ва деҳқонӣ 45 ҳазору 268,8 тонна гандум, 480,8 тонна шолӣ, 6 ҳазору 444,1 тонна дигар ғалладонагиҳо, 751,0 тонна лӯбиёгиҳо, 1083,3 тонна ҷуворимакка ва 36697,7 тонна картошкаи тухмӣ захира шудааст. Дар ин бора АМИТ «Ховар» бо истинод ба маркази матбуоти Вазорати кишоварзии мамлакат итилоъ медиҳад.

Тухмипарварӣ яке аз самтҳои муҳимтарин ва аввалиндараҷаи соҳаи кишоварзӣ ба ҳисоб рафта, дар истеҳсолоти кишоварзӣ мавқеи асосӣ дорад. Афзун намудани истеҳсоли зироати кишоварзӣ ва баланд бардоштани ҳосилнокии онҳо аз истифода бурдани тухмиҳои сертификатсияшуда вобастагии калон дорад. Вазифаи асосии тухмипарварӣ таъмин намудани хоҷагиҳо бо тухмии сертификатсияшуда, нигоҳ доштани тозагии навъҳо ва хусусиятҳои биологии онҳо мебошад.

Ба иттилои Корхонаи воҳиди давлатии «Навъҳои тухмии сабзавоти Тоҷикистон», имсол  корхона бо ширкати Агрохимияи Федератсияи  Россия оид ба ворид намудани гандуми тухмии  гурӯҳи элитаи   навъҳои   «Московская-56», «Московская-39»  ва  «Мироновская – 808» шартнома ба имзо расонид.

То 21 ноябри соли равон ҳашт қатора (вагон) гандум бо ҳаҷми   526 тонна ба ҷумҳурӣ ворид гардида, 350 тоннаи он ба хоҷагиҳои деҳқонии вилояти Хатлон ва ноҳияҳои тобеи ҷумҳурӣ дастрас гардид. Ҳоло тибқи рӯйхати мавҷуда он ба шаҳру ноҳияҳои ҷумҳурӣ тақсим шуда истодааст.