Дар Кобул ду судяи зан дар ҳамлаи шахсони мусаллаҳ кушта шуданд

ДУШАНБЕ, 18.01.2021. /АМИТ «Ховар»/. Дар идомаи террорҳои мақсаднок дар Кобул рӯзи якшанбе ду судяи зан дар натиҷаи тирандозӣ кушта ва ду тани дигар захмӣ шуданд, хабар медиҳад АМИТ «Ховар» бо истинод ба шабакаи телевизионии «Тулӯъ нюс».

Бино ба иттилои манбаъ, Президенти Афғонистон Ашраф Ғанӣ ин ҳодисаро маҳкум карда, онро «террористӣ ва хилофи таълимоти исломӣ» хондааст. «Ҳамлаи террористӣ аз сӯи гурӯҳи «Толибон» ва дигар гурӯҳҳои террористӣ болои ҳамватанони беҳимояти мо ва хушунат дар баробари онон, мухолифи таълимоти исломӣ ва рӯҳияи сулҳ буда, дар тазод бо иҷтимои миллати Афғонистон мебошад», — тазакур додаст ӯ.

Президенти ҶИА ҳамчунин аз «Толибон» (мамнӯъ дар Тоҷикистон) хостааст, ки хушунатҳо дар кишварро коҳиш ва ба оташбаси доимӣ тан диҳанд.

Ӯ меафзояд, Ҳукумати Афғонистон як бори дигар бар «Толибон» мегӯянд, ки «зӯр, террор, ваҳшат ва ҷиноят роҳи ҳалли мушкил нест ва буҳрону ҷанги мавҷуд дар кишварро душвор ва тӯлонӣ месозад. Бинобар ин, бо пазируфтани оташбаси доимӣ, иродаи ростин ва амалии худро дар робита ба сулх нишон диҳед».

Дар ҳамин ҳол, Элисон Блейк, Сафири Британия дар Кобул низ ҳамлаи силоҳбадастони ношиносро бар занони судя маҳкум карда, хостори баррасии фаврии ин ҳодиса шудааст.

Аз сӯи дигар Қатар низ ин ҳамларо маҳкум кардааст. Дар хабарномаи Вазорати корҳои хориҷии Қатар омадааст, ки ин кишвар мавқеи қатъномаашро бори дигар дар бораи «радди хушунат ва терроризм ба ҳар ангеза ва иллат» эълом мекунад.

То кунун ягон гурӯҳ, аз ҷумла «Толибон» масъулияти ин ҳамларо ба дӯш нагирифтаанд.