Дар мавзеи кӯҳии Даҳанасой барои ҳифзи ҳайвоноти ваҳшӣ дону хошок пошида шуд

ДУШАНБЕ, 29.01.2021 /АМИТ «Ховар»/. Дар талу теппаи мавзеи Даҳанасойи  ноҳияи Деваштич қариб 700 кг дону хошок, аз ҷумла 250 кг картошка, 100 кг сабус, 150 кг ҷав, 45 кг намак, 150 кг шалғам ва 12 банд алафи хушк ва коҳ пошида шуд. 

Тавре аз бахши ҳифзи муҳити зисти ноҳияи Деваштич ба хабарнигори АМИТ «Ховар» иттилоъ доданд, корҳои биотехникӣ бо мақсади ҳифзи олами ҳайвоноти ваҳшӣ, беталаф баровардани онҳо аз  фасли зимистон ва беҳтар намудани вазъи экологии минтақа аз ҷониби  кормандони бахши мазкур дар якҷоягӣ бо кормандони Муассисаи давлатии хоҷагии ҷангали ноҳия  гузаронида шуданд.