Намояндагони ИМА барои баррасии ҳалли мусолиматомез ба Афғонистон меоянд

ДУШАНБЕ, 30.01.2021 /АМИТ «Ховар»/. Гурӯҳи намояндагони расмии Америка барои баррасии масоили марбут ба ҳалли мусолиматомез дар Афғонистон ба Кобул хоҳанд омад. Тавре АМИТ «Ховар» бо истинод ба ТАСС хабар медиҳад, дар ин бора дирӯз, 29 январ, Президенти Афғонистон Ашраф Ғанӣ зимни суханронӣ дар Форуми Аспен оид ба масоили амният тариқи видеоконфрон изҳор дошт.

Ӯ тазаккур дод, ки ИМА азм дорад як гурӯҳ (кормандон)-ро ба Кобул фиристад. «Мо инчунин тавассути пайванди видеоӣ машваратҳо доир ба суръат бахшидан ба раванди ҳалли мусолиматомез ва доир ба чӣ гуна татбиқи ҳадафро таъмин кардан баргузор хоҳем кард. Гап дар бораи он меравад, ки Афғонистон соҳибихтиёр, демократӣ ва муттаҳид бошад», — илова кард Ашраф Ғанӣ.

Президенти Афғонистон гуфт, ки бесаброна занги телефонии Президент [ИМА Ҷо] Байденро интизор аст. Ғанӣ мушаххас накард, ки дақиқан кай бо роҳбари маъмурияти Америка суҳбат мекунад.

Ашраф Ғанӣ суҳбати дар аввали ҳафта бо котиби давлатии ИМА Энтони Блинкен анҷомдодаро шарҳ дода, тазаккур дод: «Ӯ ваъда дод, ки дар ҳамоҳангии комил бо мо талошҳои дипломатиро дар минтақа фаъолона идома хоҳад дод». Ашраф Ғанӣ изҳори итминон кард, ки маъмурияти Байден аз оғози кораш «таваҷҷуҳ»-ро ба рӯйдодҳое, ки дар Афғонистон рух медиҳанд, равона кард.

29 феврали соли 2020 маъмурияти қаблии ИМА бо роҳбарии Президент Доналд Трамп ва ҳаракати ифротии «Толибон» (мамнуъ дар Россия) дар Доҳа созишномаи сулҳро имзо карданд. Мувофиқи он, ИМА, иттифоқчиёни он ва эътилофи байналмилалӣ уҳдадор шуданд, ки дар тӯли 14 моҳ тамоми неруҳояшро аз Афғонистон бароранд. «Толибон», дар навбати худ, кафолат медиҳанд, ки онҳо қаламрави Афғонистонро барои амалҳое, ки ба амнияти ИМА ва иттифоқчиёни он таҳдид мекунанд, истифода нахоҳанд кард.

                         АКС аз бойгонӣ