Садир Жапаров имрӯз ба ҳайси президенти Қирғизистон расман ба кор шурӯъ кард

ДУШАНБЕ, 28.01.2021 /АМИТ «Ховар»/. Садир Жапаров расман ба ҳайси президенти Қирғизистон ба кор шурӯъ кард. Имрӯз дар маросими инаугуратсия Садир Жапаров савганд ёд кард. Пас аз савгандёдкунӣ раиси Комиссияи марказии интихоботи Қирғизистон Нуржан Шайлдабекова ба Садир Жапаров шаҳодатнома, нишони сарисинагӣ ва ливои президентиро супорид, иттилоъ медиҳад хабаргузории давлатии «КАБАР» 28 январ.

Ҳамин тариқ, Садир Жапаров расман ба ҳайси президент ба кор шурӯъ кард.

Дар маросими расмӣ беш аз ҳазор нафар ширкат намуданд. Аз ҷумла, чеҳраҳои маъруфи кишвар, вакилони Жогорку Кенеш, собиқ президентҳо, собиқ спикерҳои парлумон, собиқ сарвазирон, сарварони конфессияҳои Қирғизистон, корпуси дипломатӣ, намояндагони созмонҳои байналмилалӣ, оқсақолҳо ва шаҳрвандони одӣ даъват шуда буданд. Инчунин рақибони Жапаров дар интихоботи гузашта низ ба ин маросим даъват шуда буданд.

Ёдовар мешавем, ки 10 январ дар Қирғизистон интихоботи пеш аз муҳлати президентӣ баргузор шуд. Тибқи натиҷаҳои интихобот, Садир Жапаров бо касби 79,2% овозҳо пирӯз шуд.

                                                     АКСИ: ХИ «Кабар»