Тоҷикистон ва Қазоқистон ҳамкории иқтисодию тиҷоратиро густариш медиҳанд

ДУШАНБЕ, 15.01.2021 /АМИТ «Ховар»/. Интизор меравад, ки ояндаи наздик ҷаласаи навбатии 16-уми байниҳукуматии Тоҷикистон ва Қазоқистон оид ба ҳамкории иқтисодӣ доир гардад.

Масъалаи мазкур дар ҷараёни мулоқоти Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Саъдӣ Қодирзода  бо Сафири Фавқулода ва Мухтори Ҷумҳурии Қазоқистон дар Ҷумҳурии Тоҷикистон Аскар Тажибаев дар Душанбе матраҳ гардид.

Кумитаи давлатии сармоягузорӣ ва идораи амволи давлатии Ҷумҳурии Тоҷикистон иттилоъ медиҳад, ки дар мулоқот  масъалаҳои мубрами рушди муносибатҳои тиҷоратию иқтисодӣ ва сармоягузорӣ байни Ҷумҳурии Тоҷикистон ва Ҷумҳурии Қазоқистон, инчунин пешбурди лоиҳаҳои муштарак дар соҳаҳои гуногуни иқтисодӣ мавриди баррасӣ қарор гирифтанд.

Бо  дарназардошти имкону захираҳои фаровони мавҷуда ҳарду ҷониб омодагии худро ба таҳким ва густариши ҳамкорӣ таъкид доштанд.