Ҳушдори Кумитаи ҳолатҳои фавқулода: Бинобар сардиҳои рӯзҳои оянда аз сафарҳои бе зарурат даст кашед!
![](https://khovar.tj/wp-content/uploads/2021/01/l9k86g.jpg)
ДУШАНБЕ, 21.01.2021 /АМИТ «Ховар»/. Бино ба гузориши Агентии обуҳавошиносии Тоҷикистон 22-23 январи соли равон дар ҷумҳурӣ ҳаво тағйир меёбад. Дар водиҳо борон борида, ба барфи тар табдил мешавад, аммо дар ноҳияҳои кӯҳӣ ва баландкӯҳӣ барфи сахт хоҳад борид. Ҳаво шабона то 10 дараҷа ва рӯзона то 15 дараҷа сард (ғайр аз ВМКБ) мешавад.
Дар иртибот ба ин Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ба шаҳрвандон ва меҳмонони кишвар маслиҳат медиҳад, ки қоидаҳои бехатариро ҳатман риоя намоянд. Дар ин бора АМИТ «Ховар» бо истинод ба Кумитаи ҳолатҳои фавқулода ва мудофиаи гражданӣ хабар медиҳад.
Ҳавошиносон дар ин рӯзҳо ҳавои тираву туман ва сард пешгӯӣ мекунанд. Бинобар вуруди ҳавои сернами баҳри Миёназамин ва ҳавои сард аз самти аврупоии Федератсияи Россия дар баъзе ноҳияҳои кӯҳӣ ва наздикӯҳии тобеи ҷумҳурӣ сардӣ ва шамоли шадид имконпазир буда, дар водиҳо ба дарахтон ва симҳо часпидани барфи тар пешбинӣ шудааст.
Ҳангоми боридани барфи тар агар шумо дар кӯча бошед, ба симҳои барқ диққат диҳед ва агар дидед, ки ҷойе сим аз вазнинии барфи тар ва ё боди сарду сахт канда шудааст, ҳатман ба хадамоти кумаки фаврӣ муроҷиат намоед.
Кумитаи ҳолатҳо фавқулода ва мудофиаи гражданӣ ба ронандаҳо муроҷиат намуда, огоҳ месозад, ки дар сурати яхбандӣ, ҳавои пурборишу сард қоидаҳои ҳаракатро риоя намоянд ва хуб мешуд аз сафарҳои бе зарурат даст кашанд.