Собиқ котиби якуми Кумитаи Марказии комсомол Борис Пастухов, ки бисёр чизҳо дар Тоҷикистон ба номаш пайванданд, даргузашт

Январь 20, 2021 13:44

ДУШАНБЕ, 20.01.2021 /АМИТ «Ховар»/. Котиби якуми КМ ВЛКСМ, дипломат ва вакили даъватҳои сеюм ва чоруми Думаи давлатӣ Борис Пастухов дар синни 88 даргузашт. Дар ин бора имрӯз АМИТ «Ховар» бо истинод ба ТАСС хабар медиҳад.

Борис Николаевич Пастухов 10 октябри соли 1933 дар Москва таваллуд шудааст. Вай дар мактаби 584-уми Москва таҳсил ва онро хатм кардааст. Соли 1958 Омӯзишгоҳи олии техникии Москва ба номи Бауманро хатм кардааст. Дар солҳои 1959-1991 узви ҲКИШ буд.

Соли 1958 котиби дуюм ва соли 1959 котиби якуми комитети комсомоли ноҳияи Баумани шаҳри Москва буда, аз соли 1961 котиби дуюм ва аз соли 1962 — котиби якуми Кумитаи комсомоли шаҳри Москва буд.

Соли 1964 — котиби Кумитаи Марказии комсомол ва аз соли 1977 то 1982 — котиби якуми Кумитаи Марказии комсомол.

Солҳои 1982-1986 ба ҳайси раиси Кумитаи давлатии ИҶШС оид ба табъ ва нашр, полиграфия ва савдои китоб кор кардааст.

Номзад ба узвияти КМ ҲКИШ (1966-1978). Узви Кумитаи Марказии ҲКИШ (1978-1986).

Солҳои 1986-1989 — Сафири фавқулода ва мухтори ИҶШС дар Дания, солҳои 1989-1992 — Сафири фавқулода ва мухтори ИҶШС дар Афғонистон.

Аз соли 1992 муовини вазир, аз соли 1996 муовини якуми вазири корҳои хориҷии Федератсияи Россия.

1998-1999 — вазири Федератсияи Россия оид ба корҳои ИДМ.

Воқеан, соли 1999 вазири Федератсияи Россия оид ба корҳои ИДМ Борис Пастухов бо сафари расмӣ ба пойтахти Тоҷикистон- шаҳри Душанбе ташриф овард. Сипас ӯ бо Президенти Тоҷикистон муҳтарам Эмомалӣ Раҳмон мулоқот кард. Ҷонибҳо масъалаҳои муносибатҳои дуҷониба ва омодагии сафари Пешвои Тоҷикистонро ба Москва баррасӣ карданд.

Бисёриҳо дар Тоҷикистон Борис Пастуховро дар хотир доранд. Собиқ раиси палатаи поёнии Парлумони ҷумҳурӣ Шукурҷон Зуҳуров, ки миёнаи солҳои 80-ум котиби Кумитаи марказии комсомоли Тоҷикистон буд, ба рӯзноманигорон мегуфт, ки комсомол, аз ҷумла дар солҳои роҳбарии Борис Николаевич, мактаби тарбияи меҳнатдӯстӣ, сифатҳои олии инсонӣ ва роҳхат ҷиҳати оғози зиндагӣ барои чандин насли тоҷикистониён буд.

Комсомол воқеан таърих меофарид. Дар мавриди Тоҷикистон- ин Неругоҳи барқи обии Норак ва корхонаи азими истеҳсоли алюминий ТадАЗ мебошанд, ки то ҳол дар Осиёи Марказӣ ҳамто надоранд, инчунин талошҳои ҳарсола дар майдонҳои пахтаи ҷумҳурӣ барои ҳосил. Дар омади гап, деҳаи Солони дар ҳудуди кишвари Хабаровск бо неруи комсомолони Тоҷикистон, ки бо даъвати комсомол ба тайга рафта буданд, сохта шудааст ва ба киштии зериобии лоиҳаи 877 «Палтус» номи ифтихории «Комсомоли Тоҷикистон» дода шуда буд.

Дар бораи худи комсомолҳо бояд гуфт, ки аксари онҳо ходимони намоёни ҳизб ва давлат, олимони машҳур, нависандагон, рассомон ва мутахассисони ботаҷриба дар бисьёр соҳаҳо гардидаанд.

Соли 1997, вақте ки дар Москва Созишномаи истиқрори сулҳ ва ризоияти миллӣ дар Тоҷикистон ба имзо расид, Борис Пастухов ба ҳайси муовини аввали вазири корҳои хориҷии Россия кор мекард. Вай дар таҳия ва имзои ин санад, ки барои давлат ва халқи тоҷик воқеан тақдирсоз гардид, саҳми калон гузоштааст. 7 октябри соли 2016 Пастухов дар мусоҳиба бо рӯзномаи русии «Комилан махфӣ» формулаи сулҳ, ризоият ва бунёдкории Президенти Тоҷикистонро беназир номид. Ба ақидаи ӯ, он метавонад дар Афғонистон ва дигар нуқтаҳои доғи сайёра татбиқ карда шавад.

                                                                             АКСИ: «РИА Новости»

Январь 20, 2021 13:44

Хабарҳои дигари ин бахш

Сафири Тоҷикистон дар Вазорати федеролии корҳои хориҷии Германия мулоқот намуд
Дар Душанбе масъалаҳои баргузории конфронси вазирони «Қалби Осиё-Раванди Истанбул» баррасӣ гардиданд
Вазири корҳои хориҷии Тоҷикистон бо Раиси Вулуси ҷиргаи Шӯрои миллии Афғонистон мулоқот намуд
Мир Раҳмон Раҳмонӣ: «Тоҷикистон ҷонибдори барқарории сулҳ дар Афғонистон мебошад»
Дар Кобул ҷаласаи сафирони кишварҳои узви «Қалби Осиё-Раванди Истанбул» баргузор гардид
Муовинони якуми вазирони корҳои хориҷии Тоҷикистон ва Ӯзбекистон мулоқот намуданд
Маҳмадшариф Ҳақдод дар ҷаласаи Шӯрои намояндагони доимии кишварҳои ИДМ ширкат варзид
Тоҷикистон ва Фаластин масъалаҳои ҳамкории мутақобилан судмандро баррасӣ намуданд
Авлавияти раёсати Тоҷикистон дар Созмони ҳамкории Шанхай ба расонаҳои мисрӣ муаррифӣ гардид
Дар Ҷидда раванди татбиқи лоиҳаҳои муштараки Тоҷикистон ва Бонки исломии рушд баррасӣ гардид
Вазири корҳои хориҷии Тоҷикистон бо Намояндаи вежаи Дабири кулли СММ дар Осиёи Марказӣ суҳбати телефонӣ анҷом дод
Консули генералии Тоҷикистон дар шаҳри Новосибирск ба шаҳри Красноярск сафари корӣ намуд

Хабарҳои муҳимтарин

Маводҳои таҳлилӣ