Раҳоии 16 бошандаи вулусволиҳои Молистон ва Ҷоғурии вилояти Ғазнӣ аз асорати «Толибон»

ДУШАНБЕ, 25.02.2021 /АМИТ «Ховар»/. Мақомоти маҳаллии вилояти Ғазнии ҶИА мегӯянд, ки мусофирони рабудашуда дар Қарабоғ шаби гузашта аз асорати “Толибон” (мамнуъ дар Тоҷикистон) раҳо карда шуданд, хабар медиҳад АМИТ «Ховар» бо истинод ба сомонаи “Садои Амрико” дар Афғонистон (www.darivoa.com.).

Ориф Боҳунар, роҳбари вулусволии Ҷоғурӣ, рӯзи 24 феврал ба “Садои Амрико” гуфтааст, ки 16 сокини вулусволиҳои Молистон ва Ҷоғурӣ пас аз раҳоӣ аз боздоштгоҳи “Толибон” ба Ғазнӣ интиқол дода шуданд.

Ҳасан Ризо Юсуфӣ, намояндаи Ҷоғурӣ дар Шӯрои вилоятии Ғазнӣ ба “Садои Амрико” гуфт, ки ин афрод дар натиҷаи миёнаравии уламои дин ва бузургони қавмии вулусволиҳои Ҷоғурӣ ва Қарабоғ аз чанги “Толибон” озод шуданд.

“Толибон” ин афродро ду моҳ пеш дар ҳудуди вулусволии Қарабоғи вилояти Ғазнӣ мошинҳо фароварда, бо худ бурда буданд.

Шӯрои вилоятии Ғазнӣ гуфтааст, ки тамоми ин афрод ғайринизомӣ ҳастанд ва далели рабуда шудану раҳоии онҳо тавассути ”Толибон” ҳанӯз муайян нашудааст.

Дар бораи ин хабар “Толибон” изҳори назар накардаанд.