Дар ҳамлаи нафарони мусаллаҳ ба хонаи хабарнигор Бисмиллоҳ Одил дар Афғонистон се тан кушта шуданд

ДУШАНБЕ, 27.02.2021 /АМИТ «Ховар»/. Хабарнигорони маҳаллӣ мегӯянд, се нафаре, ки дар ин рӯйдод кушта шуданд, аъзои хонаводаи Бисмиллоҳ Одил ҳастанд,  хабар медиҳад АМИТ «Ховар» ба истинод ба «ToloNews»-и Афғонистон.

Нафарони мусаллаҳ шаби гузашта ба хонаи Бисмиллоҳ Одил, собиқ масъули радиои «Садои Ғур»-и Афғонистон ҳамла карданд.

Дар асоси гузориши хабарнигорони маҳаллӣ, Лоло Гул, бародари Бисмиллоҳ Одил мегӯяд, ки дар ҳамла ба хонаи марҳум Одил як бародар, як писари бародари ӯ ва як хоҳарзодааш, ки духтари 13 сола буд, ҷон бохта, 5 тани дигар маҷрӯх шуданд.

Ба гуфтаи хабарнигорон, бародари марҳум Одил иддао дорад, ки ин ҳамла аз сӯи «Толибон» (мамнуъ дар Тоҷикистон) анҷом шуд, аммо як сухангӯи «Толибон» даст доштани ҷангиёни ин ташкилотро ба ин ҳодиса рад кард.

Бисмиллоҳ Одил, собиқ масъули радиои «Садои Ғур» буд, ки қариб ду моҳ пеш дар як ҳамла аз сӯи афроди мусаллаҳи ношинос ҷон бохта буд.