Дар гармхонаҳои шаҳри Норак 400 ҳазор бех гулҳои мавсимӣ парвариш меёбанд

 ДУШАНБЕ, 01.02.2021 /АМИТ «Ховар»/.  Дар айни замон дар гармхонаҳои шаҳри Норак 70-80 номгӯй гулҳои мавсимӣ ба миқдори 400 ҳазор бех парвариш меёбанд. Бо мусоид омадани боду ҳаво маъракаи гулшинонӣ дар шаҳр вусъати тоза мегирад.

Бо мақсади сазовор пешвоз гирифтани ҷашни 30-солагии Истиқлоли давлатии Ҷумҳурии Тоҷикистон дар шаҳри Норак корҳои созандагию  хуррамгардонӣ бо маром идома дошта, айни ҳол  дар Муассисаи давлатии «Гармхонаҳои доимоамалкунанда» 20 намуд маҳсулоти сабзавотӣ парвариш карда мешаванд.

Тавре аз мақомоти иҷроияи ҳокимияти давлатии шаҳри Норак иттилоъ доданд, раиси шаҳр Дилшод Асозода бо мақсади шиносоӣ бо ҷараёни парвариши гулҳои мавсимӣ аз муассисаи мазкур дидан намуда, барои ҳарчи бештар гулпӯш намудани кӯчаю роҳравҳо ва назди муассисаю корхонаҳои шаҳр дастуру супоришҳои мушаххас дода, масъулинро вазифадор намуд, ки баҳри омода намудани боз 350 ҳазор адад гулҳои мавсимӣ чора бинанд.