Дар шаҳри Душанбе Фестивали бозиҳои миллии варзишӣ доир гардид

ДУШАНБЕ, 06.02.2021 /АМИТ «Ховар»/. 5 феврал дар Маҷмааи варзишии Кумитаи андози назди Ҳукумати Ҷумҳурии Тоҷикистон бо иштироки беш аз ҳазор нафар варзишгарону дӯстдорони навъи бозиҳои миллии варзишӣ Фестивали бозиҳои миллии варзишӣ сурат гирифт.

Тавре аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон иттилоъ доданд, Фестивали мазкур бо мақсади амалигардонии дастуру супоришҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва дастуру роҳнамоиҳои Раиси шаҳри Душанбе муҳтарам Рустами Эмомалӣ доир гардид.

Дар маросими баргузории Фестивали бозиҳои миллии варзишӣ Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Абдулло Раҳмонзода,  муовини Раиси шаҳри Душанбе Мавсума Муинӣ,  сардори Раёсати кор бо ҷавонон ва варзиши шаҳри Душанбе Шоҳзод Раҳимзода ва дигар масъулини соҳаи кор бо ҷавонон ва варзиш иштирок намуданд.

Дар Фестивали бозиҳои миллии варзишӣ наврасону ҷавонони аз 14 то 30-сола аз рӯи 2 намуди бозиҳо: намудҳои сабқат, рақобати даставӣ ва намудҳои бозиҳои намоишӣ иштирок намуданд. Инчунин дар Фестивал бозиҳои сабқат ва рақобати даставӣ, гӯштингирӣ, чавгонбозӣ, шиноварӣ, вазнбардорӣ (сангбардорӣ), дастхобонӣ, пойга (варзиши сабук, давидан ба масофаҳои 200, 400, 800 метр), шоҳмот ва бандкашӣ намоиш дода шуданд.

Дар ҷараёни Фестивали бозиҳои миллии варзишӣ бозиҳои хурӯсҷанг, чиликдангал, ланкабозӣ, буҷулбозӣ, камонварӣ, шамшерзанӣ, камонғулак, фалахмолпартоӣ, ҳойталак ва бандпарак  ба маърази тамошо гузошта шуданд.

Зикр гардид, ки Фестивали бозиҳои миллии варзишӣ бахшида ба Солҳои рушди деҳот, сайёҳӣ ва ҳунарҳои мардумӣ ва таҷлили сазовори ҷашни 30-солагии Истиқлоли давлатии Ҷумҳурии Тоҷикистон роҳандозӣ шуда, мақсади асосии он эҳё ва рушди бозиҳои миллии варзишӣ, тарбияи насли наврас дар рӯҳияи эҳтиром ва арҷгузорӣ ба таърих, фарҳанг, таҳкими тарзи ҳаёти солим, ҳисси худшиносиву худогоҳӣ, зиракии сиёсӣ ва пешгирии омилҳои номатлуб миёни насли наврас ва ҷавонон мебошад.

Фестивали бозиҳои миллии варзишӣ дар пойтахт минбаъд ҳар сол, хосса давоми соли 2021 дар се марҳила бахшида ба таҷлили ҷашни 30- солагии Истиқлоли давлатии Ҷумҳурии Тоҷикистон роҳандозӣ гардида, марҳилаҳои баргузории намудҳои варзишии он тариқи ВАО эълон карда мешавад.

Ёдовар мешавем, ки бо мақсади инкишоф, эҳё ва ба таври васеъ тарғиб намудани намудҳои гуногуни бозиҳои миллии варзишӣ, ки беш аз 151 намудро ташкил медиҳанд, бо иқдоми Кумитаи кор бо ҷавонон ва варзиши назди Ҳукумати Ҷумҳурии Тоҷикистон Федератсияи бозиҳои миллии варзишӣ таъсис дода шуд.