Дастаи шашкабозони Кумитаи рушди сайёҳӣ ба дарёфти Ҷоми Вазири корҳои дохилӣ мушарраф гардид

ДУШАНБЕ, 23.02.2021 /АМИТ «Ховар»/. Дастаи Кумитаи рушди сайёҳӣ дар мусобиқаи кушоди варзишӣ оид ба шоҳмоту шашка, ки  байни кормандони мақомоти ҳифзи ҳуқуқ, сохторҳои қудратӣ ва корхонаю идораҳои ҷумҳурӣ барои дарёфти «Ҷоми Вазири корҳои дохилӣ» доир гардид, дар бозии шашка сазовори ҷойи аввал гардид.   

Аз Кумитаи рушди сайёҳии назди Ҳукумати Ҷумҳурии Тоҷикистон ба АМИТ «Ховар» иттилоъ доданд, ки мусобиқаи мазкур ба ифтихори ҷашни 30-солагии Истиқлоли давлатии Ҷумҳурии Тоҷикистон доир гардида, ҳадафаш оммавигардонии варзиш ва тақвияти тарзи ҳаёти солим дар ҷомеа мебошад.

Кумитаи рушди сайёҳӣ минбаъд низ талош дорад, ки  дар партави дастуру ҳидоятҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баҳри оммавигардонии варзиш ва таҳкими тарзи ҳаёти солим аз тамоми имконият самаранок истифода карда, ҷиҳати заминагузорӣ дар солимии миллат ҳамчун боигарии давлат ҳиссаи арзишманд гузорад.