Ҷоми ФФТ-2021. Дастаи «Барқчӣ» ба марҳилаи ниҳоӣ баромад

ДУШАНБЕ, 01.02.2021 /АМИТ «Ховар»/. «Барқчӣ»-и Ҳисор бо мағлуб намудани  дастаи «Ваҳдат» бо ҳисоби 4:2 дар даври сеюми марҳилаи муқаддамотии Ҷоми Федератсияи футболи Тоҷикистон-2021 ба даври ниҳоии мусобиқа роҳхат пайдо кард. Дар ин бора АМИТ «Ховар» бо истинод ба Федератсияи футболи Тоҷикистон хабар медиҳад.

Дар доираи марҳилаи муқаддамотии мусобиқаи Ҷоми Федератсияи футболи Тоҷикистон-2021 дар минтақаи Душанбе бозиҳои даври сеюм баргузор гардиданд. Дар гурӯҳи “А” дастаи “Кӯктош” “Локомотив-Помир”-ро бо ҳисоби 4:1 мағлуб намуд. КМВА бар “Шоҳмансур” бо ҳисоби 2:0 дастболо гардид.

Дар гурӯҳи “Б” “Барқчӣ” бо ҳисоби 4:2 дастаи “Ваҳдат”-ро мағлуб намуд, дар дербии пойтахт “Душанбе-83” “Истиқлол”-ро бо ҳисоби  1:0 шикаст дод.

Ҳамин тариқ, бозиҳо дар гурӯҳи “Б” ба анҷом расиданд. Ба марҳилаи ниҳоии Ҷоми ФФТ-2021 аз ин гурӯҳ “Истиқлол” ва “Барқчӣ” баромаданд.

Дар гурӯҳи “А” ду давр бозиҳои дигар мондаанд. Пас аз се даври бозиҳо дар садри гурӯҳ “Кӯктош” бо касби ҳафт имтиёз қарор дорад. Аз ин гурӯҳ низ ду дастаи беҳтарин ба марҳилаи ниҳоии Ҷоми ФФТ роҳхат пайдо мекунанд.

АКСҲО аз ФФТ