Парвиз Акрамзода: Ангурпарварони шаҳри Турсунзода 150 тонна мавиз тайёр карда, 90 тоннаашро ба хориҷа содир намуданд

ДУШАНБЕ, 12.02.2021 /АМИТ «Ховар»/. Деҳқонону ангурпарварони шаҳри Турсунзода соли гузашта коркарди ангурро ба таври густурда ба роҳ монда, дар натиҷа 150 тонна мавиз омода намуданд, ки  90 тоннааш ба хориҷи мамлакат,  асосан ба кишварҳои ҳамҷавори Ӯзбекистон ва Қирғизистон содир гардид.

Ин матлабро Раиси шаҳри Турсунзода Парвиз Акрамзода имрӯз ба намояндагони расонаҳои хабарӣ дар нишасти матбуотӣ иброз дошта, афзуд, ки коркарди маҳсулоти кишоварзӣ, хусусан хушкмева  ва содироти он ба хориҷи мамлакат  зери таваҷҷуҳи доимии  Сарвари давлат муҳтарам Эмомалӣ Раҳмон қарор дошта, дар ин самт деҳқонону  ангурпарварони шаҳри Турсунзода, ки таҷрибаи бой доранд, дастуру супоришҳои Пешвои миллатро сармашқи кори худ қарор дода, дар татбиқи яке аз ҳадафҳои стратегии Ҳукумати Ҷумҳурии  Тоҷикистон–таъмини амнияти озуқаворӣ нақши муассир мегузоранд.

Зикр гардид, ки деҳқонону ангурпарварони шаҳр ба коркарди ангур хеле ҳавасманд буда, аз ин ҳисоб ҳамасола фоидаи калон ба даст меоранд. Агар нархи 1 килограмм ангури сиёҳ дар вақти ғунучин 8 сомонӣ бошад, ҳангоме, ки он  коркард гардида, мавиз омода мешавад, нархи 1 килограмм мавиз дар бозор 100-120 сомониро ташкил медиҳад. Аз 4 килограмм ангур, ки 32 сомониро ташкил медиҳад, 1 килограмм мавиз омода мегардад, ки нархаш ба 100-120 сомонӣ баробар аст.

Ҳамзамон Парвиз Акрамзода зикр кард, ки «ҳоло соҳибкорони шаҳр бо  мақсади воридоти дастгоҳу таҷҳизоти замонавӣ барои коркарди меваю сабзавот дар кишварҳои Туркия ва Чин қарор доранд. Бо ворид намудани ин гуна таҷҳизоти муосир коргоҳу корхонаҳои коркарди меваю сабзавот ба роҳ монда шуда, ҷойҳои нави корӣ ташкил мегарданд».