Сомон ба даври сеюм роҳ ёфт, вале Беҳрӯз ва Акмал аз идомаи мусобиқаи Tel Aviv Grand Slam-2021 маҳрум шуданд

ДУШАНБЕ, 19.02.2021 /АМИТ «Ховар»/. Чанд лаҳза пеш се паҳлавони маъруфи тоҷик — Сомон Маҳмадбеков, Беҳрӯз Хоҷазода (ҳарду дар вазни -73кг)  ва Акмал Муродов (-81кг)  дар мусобиқаи Tel Aviv Grand Slam – 2021 бо ҳарифҳояшон рақобат  карданд. Паҳлавони шинохтаи тоҷик Сомон Маҳмадбеков, ки дар вазни -73  Тоҷикистонро дар мусобиқаи  мазкур  намояндагӣ мекунад, бо ҳарифаш аз  Полша Стодолски Адам рақобат карда, ӯро бо бартарии «Иппон» мағлуб  намуд ва ба даври сеюм роҳ  ёфт. Дар ин  бора шореҳи  варзиши АМИТ «Ховар» Меҳрони  Қурбон бо истинод ба Федератсияи дзюдои Тоҷикистон хабар медиҳад.

Варзишгари тоҷик Акмал Муродов, ки Тоҷикистонро дар мусобиқаи Tel Aviv Grand Slam – 2021 дар вазни -81 кг намояндагӣ мекунад, бо ҳарифи пуркувваташ  вориди майдон гардид. Дар даври аввали ин чорабинӣ варзишгари мо аз намояндаи Германия- Александр Вечерзак бо усули «Иппон» мағлуб  шуда, аз идомаи сабқатҳо маҳрум шуд. Александр Вечерзак 29 сол дошта, дар рейтинги IJF дар вазни -81кг бо касби 1831 хол дар зинаи 33-юм қарор дорад. Акмал Муродов бо доштани 842 имтиёз дар ҷои 55-ум мавқеъ касб намудааст.

Пас аз бохти Акмал Муродов паҳлавонони  дигари тоҷик Беҳрӯзи Хоҷазода    дар вазни -73 кг дар нахустин рақобати хеш бо намояндаи ӯзбекистонӣ – Ҷалолиддин Бойназаров, ки дар рейтингӣ IJF умуман вуҷуд надорад, рақобат кард. Дар ин майдондорӣ Беҳрӯзи Хоҷазода аз Ҷалолиддин Бойназарови бетаҷриба мағлуб шуда, аз идомаи сабқатҳо бенасиб шуд.

Тавре АМИТ “Ховар” қаблан иттилоъ дода буд, дар мусобиқаи мазкур  шаш варзишгари маъруфи тоҷик — Сомон Маҳмадбеков, Беҳрӯз Хоҷазода (ҳарду дар вазни -73кг), Акмал Муродов (-81кг), Комроншоҳ Устопириён (-90кг), Темур Раҳимов, Шакармамад Мирмамадов (+100кг)  иштирок доранд.

Мусобиқаи мазкур  18 феврал оғоз шуда, дар рӯзи якуми  он рақобатҳо миёни бонувон дар вазнҳои -48кг, -52кг, -57кг ва миёни мардон дар ду вазн -60кг ва 66-кг сурат гирифтанд.

Дар мусобиқаи мазкур иштироки 437 нафар варзишгар (254 мард, 183 зан) аз 63 давлат дар назар аст.

Хотиррасон  мешавем, ки дар рӯзи охири мусобиқа Комроншоҳ Устопириён (-90кг) бо Юто Виллар-Галаррето (Перу), Темур Раҳимов бо Ерасл Кажибаев (Қазоқистон) ва Шакармамад Мирмамадов бо Наор Итах (Исроил)  байни ҳам  рақобат  мекунанд

Имрӯз-  дар рӯзи дуюм паҳлавонони вазнашон -73кг, -81кг миёни мардон, -63кг, -70кг миёни бонувон рақобат мекунанд. Мусобиқа бо қувваозмоиҳои варзишгарони вазнашон -90кг, -100кг, +100кг миёни мардон, -78кг, +78 миёни бонувон анҷом меёбад.

Ба ғолибон ва ҷоизадорони мусобиқаи  «Tel Aviv Grand Slam» дар баробари медал ҷоизапулӣ низ тақдим карда мешавад. Барои ғолибон 5000 доллари ИМА, барои ҷои дуюм 3000 доллар ва барои ду ҷои сеюм 1500-долларӣ дар назар гирифта шудааст.

Ҳамчунин варзишгарон вобаста ба мавқеашон соҳиби холҳо мегарданд, ки аз рӯи он раддабандии ҷаҳонӣ ва олимпӣ шакл мегирад. Аз ҷумла, варзишгароне, ки ҷои аввалро мегиранд, 1000 хол, ҷои дуюм – 700 ва ҷои сеюм 500 хол ба даст меоран

Ёдовар  мешавем, ки аз 18 то 20  феврали соли равон  дар пойтахти Исроил – шаҳри Тел Авив мусобиқаи навбатӣ оид ба дзюдо – «Tel Aviv Grand Slam» баргузор мешавад.