ТАҚВИМИ АМИТ «ХОВАР»: имрӯз 8 феврал, душанбе, 39-умин рӯзи соли 2021 аст

8 феврали соли 2010 дар шаҳри Душанбе масоили ҳамкорӣ миёни минтақаҳои Тоҷикистон ва Қирғизистон, аз ҷумла, дар соҳаҳои кишоварзӣ, саноат ва сайёҳӣ баррасӣ шуд.

***

7 сол пеш, 8 феврали соли 2014 Президенти Ҷумҳурии Тоҷикистон муҳтарам Эмомалӣ Раҳмон дар маросими бошукӯҳи ифтитоҳи Бозиҳои 22-юми зимистонаи олимпӣ дар шаҳри Сочии Федератсияи Россия иштирок намуданд. Дар ин маросим роҳбарони давлатҳо ва намояндагони воломақоми зиёда аз 80 кишвар ва созмонҳои минтақавию ҷаҳонӣ иштирок доштанд.

 ***

Дар ин рӯзи соли 2016 барномаи давлатии рушди муассисаҳои фарҳангии Ҷумҳурии Тоҷикистон ва Нақшаи генералии шаҳраки Абдураҳмони Ҷомӣ тасдиқ карда шуд.

8 ФЕВРАЛ ТАҶЛИЛ КАРДА МЕШАВАД:

Рӯзи илм дар Федератсияи  Россия.

 РӮЙДОДҲО:

8 феврали соли 2009 Президенти вақти Афғонистон  Ҳомид Карзай пайравони ҳаракати «Толибон»-ро ба сулҳ даъват намуд. Ӯ ба ҳамаи «Толибон» пешниҳод намуд, ки нафарони ба «Ал-Қоида» ва дигар гурӯҳҳои террористӣ ҳамкорӣ надошта ба хонаҳояшон баргарданд ва «зиндагии хуб» гузаронанд.

***

8 феврали соли 2011 АМИТ «Ховар» хабар дод, ки раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров узви Шӯрои Иттиҳодияи парлумонҳои давлатҳои аъзои Созмони конфронси исломӣ интихоб гардид.

***

10 сол пеш, 8 феврали соли 2011 дар шабакаи умумиҷаҳонии Интернет  сомонаи нав — www.mahmudnoma.tj  — дар бораи асосгузори театри касбии тоҷик Ҳомид Маҳмудов кушода шуд.

***

8 феврали соли 2013 миёни Ҷумҳурии Тоҷикистон ва Федератсияи Россия дар бораи тартиби будубоши шаҳрвандони Ҷумҳурии Тоҷикистон дар ҳудуди Федератсияи Россия созишнома ба имзо расид.

***

Дар ин рӯзи соли 1919 миёни Париж ва Лондон хатсайри ҳавоӣ ифтитоҳ гардид.

***

8 феврали соли 1931 маросими ботантанаи ифтитоҳи пойтахти нави Ҳиндустон – Ню-Деҳлӣ баргузор гардид.

ИНЧУНИН ДАР ИН РӮЗ…

Соли 1919 духтури чикагоӣ Ҷеймс Херрик аввалин маротиба дар  таърихи олам кардиограммаи нуқси дилро нашр намуд.