Таркиш дар Кобул ҷони як устоди донишгоҳ ва як нафари дигарро рабуд

ДУШАНБЕ, 19.02.2021 /АМИТ «Ховар»/. Полиси шаҳри Кобул-пойтахти Афғонистон изҳор доштааст, ки ин таркиш дар ҷодаи беморхонаи Алиобод ҳавзаи сеюми Кобул ба вуқӯъ пайваст, хабар медиҳад АМИТ «Ховар» бо истинод ба шабакаи телевизионии tolonews.com.

Таркише, ки рӯзи панҷшанбе 18 феврал дар назди дарвозаи Донишгоҳи Кобул рух дод, ҷони Мубашир Муслимёр, устоди донишкадаи шаръиёти ин донишгоҳро рабуд.

Автомашинаи ҷаноби Мубашир замоне мавриди ҳамлаи террористон қарор гирифт, ки ӯ пас аз дарс аз фанни низоми сиёсии ислом аз як мадрасаи динӣ хориҷ мешуд.

Дар ин таркиш як шогирди ҷаноби Мубашир низ кушта шуд.

Лоло Оғо, шоҳиди ҳодиса, гуфт: «Вақте ки мо рафтем автомашина оташ гирифта буд. Устодро аз мошин берун овардем, пойҳо ва ними баданаш набуд».

Мубашир Муслимёр соли 2005 мактабро дар Кобул хатм кардааст. Маълумоти олиро дар Ҳирот гирифтааст. Вай дараҷаи магистр дар улуми исломӣ дошт ва даҳ сол боз профессори факултаи шариати Донишгоҳи Кобул буд.

Ӯ тақрибан ду сол пеш бо иттиҳоми ҳамкорӣ бо ДИИШ боздошт шуда буд.

Вазорати маълумоти олӣ мегӯяд, ки ӯ пас аз як соли зиндон авф шуд ва ба донишгоҳ баргашт.

Куштори ҳадафманди уламои динӣ имсол бесобиқа будааст. То ҳол дар чунин ҳамлаҳо чанд донишманди дин кушта шудаанд. Марги Муҳаммад Отиф, раиси Шӯрои марказии ҷамъияти ислоҳ, дар рӯйдоди ҳамсон се ҳафта қабл, мисоли барҷастаи он аст.