«Толибон»* робитаашро бо «Ал-Қоида»* накандааст

ДУШАНБЕ, 24.02.2021 /АМИТ «Ховар»/. Ҳафтаи гузашта Эдмунд Браун, ҳамоҳангсози гурӯҳи назоратии СММ аз қатъ нашудани робитаҳои «Толибон»* бо шабакаи «Ал-Қоида» иттилоъ додааст.  Дар ин бора АМИТ «Ховар» бо истинод ба шабакаи телевизионии NBC News хабар медиҳад.

Вай, ки фаъолияти «Толибон»* ва дигар шӯришиёнро дар Афғонистон назорат мекунад, гуфт, ки «Толибон»* бо вуҷуди уҳдадориҳои худ дар тавофуқномаи Давҳа бо ИМА, ба қатъи ҳамкорӣ бо гурӯҳҳои террористӣ ба ҷангиёни хориҷӣ иҷозат медиҳад, то дар Афғонистон омӯзиш бигиранд ва ҷангҷӯёнро дар канори неруҳои худ ҷобаҷо мекунад ва робитаи наздикро бо «Ал-Қоида»* идома медиҳад.

Вай бовар дорад, ки роҳбарияти олии «Ал-Қоида»*  зери ҳимояти «Толибон»* аст.

Гурӯҳи назоратии СММ низ гузориш додааст, ки дар 11 вилояти Афғонистон аз 200 то 500 ҷангҷӯи шабакаи «Ал-Қоида» ҳузур доранд.

Дар асоси ин гузориш, ҷангиёни «Ал-Қоида»* ва «Толибон»* даҳсолаҳо якҷоя зиндагӣ карда, мубориза мебурданд ва аз ҳам ҷудо шудан барояшон душвор хоҳад буд.

Аммо «Толибон»* қаблан ҳар гуна иртиботро бо ҷангиёни хориҷӣ рад карда буданд.

АКС аз манбаҳои боз

______________________________________

 * «Ал-Қоида» ва «Толибон» – ташкилот ва ҳаракати мамнуъ дар Тоҷикистон ва як қатор кишварҳои дигар