Дар Душанбе бахшида ба Рӯзи милитсияи тоҷик ҷамъомади тантанавӣ доир шуд

ДУШАНБЕ, 09.11.2026 /АМИТ «Ховар»/. Дар Театри давлатии академии опера ва балети ба номи Садриддин Айнӣ ба муносибати Рӯзи милитсияи тоҷик ҷамъомади тантанавӣ баргузор гардид. Дар ин хусус ба АМИТ «Ховар» аз Раёсати Вазорати корҳои дохилии Ҷумҳурии Тоҷикистон дар шаҳри Душанбе хабар доданд.

Зимни ҳамоиш иштирокчиён аз таърихи ташаккул ва роҳи пуршарафи милитсияи тоҷик ёдовар шуда, саҳми арзандаи кормандони мақомоти корҳои дохилиро дар таъмини тартиботи ҷамъиятӣ, ҳифзи ҳуқуқу озодиҳои шаҳрвандон, мубориза бар зидди ҷинояткорӣ ва таҳкими суботу амнияти ҷомеа муҳим арзёбӣ намуданд.

Иброз гардид, ки милитсияи тоҷик давоми фаъолият марҳилаҳои гуногуни таърихиро паси сар намуда, дар таҳкими пояҳои давлатдории миллӣ, ҳифзи дастовардҳои истиқлоли давлатӣ ва таъмини фазои орому осоиштаи мамлакат нақши муҳим дорад. Имрӯз низ кормандони мақомоти корҳои дохилӣ бо истифода аз таҷрибаи касбӣ, дониш ва малакаи муосир барои пешгирии ҳуқуқвайронкуниҳо ва мубориза бо зуҳуроти номатлуби ҷомеа фаъолият мебаранд.

Таъкид гардид, ки кормандони мақомоти милитсия бо садоқат ба савганди касбӣ ва эҳсоси баланди масъулият дар назди давлату миллат барои ҳифзи ҳуқуқу манфиатҳои қонунии шаҳрвандон, таъмини суботу оромӣ ва амнияти ҷомеа ҳамеша содиқона хизмат менамоянд.

Баланд бардоштани сатҳи касбият, риояи қатъии қонуният, муносибати боэҳтиром бо шаҳрвандон ва ҳифзи ҳуқуқу манфиатҳои онҳо аз самтҳои муҳимми фаъолияти мақомоти корҳои дохилӣ ба шумор мераванд. Зеро эътимоди ҷомеа ба милитсия, пеш аз ҳама, аз масъулиятшиносӣ, рафтори намунавӣ ва иҷрои содиқонаи вазифаҳои хизматӣ вобастагии мустақим дорад.

АКС: Раёсати Вазорати корҳои дохилӣ дар шаҳри Душанбе