Дар ноҳияи Деваштич истеҳсолкунандаи асали сунъӣ боздошт шуд

 ДУШАНБЕ, 02.03.2021 /АМИТ «Ховар»/. Санҷиши маълумоти фаврии воридшуда ба шуъбаи Вазорати корҳои дохилӣ дар ноҳияи Деваштич тасдиқ кард, ки шаҳрванд Шаҳриёр Қосимов, соли таваллудаш 1999, истиқоматкунандаи Ҷамоати деҳоти Росровути ноҳияи Деваштич дидаву дониста, ҷинояти фиреби истеъмолкунандагонро содир намудааст. 

Тавре аз Вазорати корҳои дохилӣ ба АМИТ «Ховар» иттилоъ доданд, гумонбаршуда қариб як сол инҷониб ба истеҳсоли асали сунъӣ машғул шуда, бо истифода аз шакар, кислотаи лиму, оби нӯшокӣ ва иловагиҳои маззадиҳанда маҳсулоти ба асал монанд таҳия ва онро дар ҳудуди шаҳру ноҳияҳои Деваштич, Зафаробод, Спитамен, Ҷ.Расулов, Хуҷанд, Б.Ғафуров, Мастчоҳ ва Конибодому Исфара ҳамчун асали табиии дар шароити кӯҳистон истеҳсолшуда ба фурӯш мебаровард. Бо ҳамин мақсад ҳуҷраеро дар шаҳраки Меҳрободи ноҳияи Ҷ.Расулов ба иҷора гирифта, дар шароити ғайрисанитарӣ моеъи зоҳиран ба асал монанд омода месохт.

Ташхис муайян кардааст, ки маҳсулоти истеҳсол намудаи Шаҳриёр Қосимов дар таркибаш кислотаи лиму ва миқдори зиёди крахмал дошта, барои истеъмол ба саломатии инсон зараровар мебошад ва метавонад ҳассосият (аллергия), яъне аксуламали музмини системаи масунияти организми одам ба маводу маҳсулотеро ба вуҷуд орад, ки маъмулан безарар ҳастанд.

Бинобар тафтишоти пешакӣ, гумонбаршуда барои таҳияи 1 кг асали сунъӣ қариб 10 сомонӣ хароҷот карда, онро аз 20 то 30 сомонӣ мефурӯхт. Маҳз фарқияти нархи асали худсоз нисбат ба намуди табиии он харидоронро ҷалб сохтаву фиреб хӯрдаанд.
Ошкор шудани ҷинояти мазкур аз тарафи милитсия дар ҳифзи саломатии аҳолӣ бе таъсир нахоҳад буд.

Айни ҳол нисбат ба Шаҳриёр Қосимов тибқи талаботи моддаи 294 Кодекси ҷиноятӣ — фиреби истеъмолкунанда парвандаи ҷиноятӣ оғоз карда шуда, ҳамзамон зимни банду басти парвандаи ҷиноятӣ зам гардидани моддаи 209-и ҳамин Кодекс эҳтимол дорад.