Дар рӯзҳои ҷашни Наврӯз ба мактаб-интернати шаҳри Кӯлоб кумак расонида шуд

ДУШАНБЕ, 23.01.2021 /АМИТ «Ховар»/. Дар рӯзҳои ҷашни байналмилалии Наврӯз бо пайгирӣ аз сиёсати хирадмандонаи Сарвари давлат аз ҷониби вакили Маҷлиси вакилони халқи шаҳри Кӯлоб аз Ҳизби Халқии Демократии Тоҷикистон Наргис Қурбонзода ва бо иштироки раиси Кумитаи иҷроияи ҲХДТ дар шаҳри Кӯлоб Гулрухсор Шарифзода ба Мактаб-интернати ҷумҳуриявии ятимону бепарасторон дар шаҳри Кӯлоб 10 халта орд ва равған кумак расонида шуд. Дар ин бора аз Кумитаи иҷроияи ҲХДТ дар шаҳри Кӯлоб хабар доданд. 

Гулрухсор Шарифзода зикр намуд, ки аёдати шахсони яккаву танҳо, табақаи ниёзманди ҷомеа ва пайваста ғамхорӣ намудан нисбат ба ятимону бепарасторон аз фазилатҳои неки инсонӣ мебошанд. Дар асоси дастуру ҳидоятҳои хайрхоҳонаи Пешвои миллат Ҳизби Халқии Демократии Тоҷикистон ва вакилони он чунин корҳои хайру савобро мунтазам роҳандозӣ намуда, дар доираи имконият ба ин қишри ҷомеа дасти кумак дароз мекунанд.

Роҳбарияти ин боргоҳи таълимӣ ва таҳсилкунандагони он барои чунин иқдоми хайрхоҳона изҳори миннатдорӣ намуданд.