Дар шаҳри Бӯстон мумфаршкунии кӯчаҳо оғоз шуд

ДУШАНБЕ, 21.03.2021 /АМИТ «Ховар»/. Дар шаҳри Бӯстон ба мумфаршкунии кӯчаҳои ба номи Нурулло Ҳувайдуллоев ва Бобоҷон Ғафурови шаҳри Бӯстон оғоз бахшида шуд. Дар ин бора аз мақомоти иҷроияи ҳокимияти давлатии шаҳри Бӯстон ба АМИТ «Ховар» хабар доданд.

Дар расми оғози он раиси вилояти Суғд Раҷаббой Аҳмадзода ва раиси шаҳри Бӯстон Раъно Ҳошимзода иштирок намуданд.

Раҷаббой Аҳамадзода  зимни суҳбат фарорасии Иди байналмилалии Наврӯзро ба сокинони шаҳри Бӯстон табрик гуфта, иброз дошт, ки миллати куҳанбунёди тоҷик Наврӯзро бо риояи анъанаву суннатҳо ҳамасола дар рӯҳияи баланд таҷлил намуда, онро чун ойини башардӯстонаву офаранда ба дигар халқҳои дунё муаррифӣ намудаанд. Гуфта шуд, ки бо фаро расидани баҳор корҳои ободониву созандагӣ вусъат ёфта, баҳри сарсабзу хуррам гардонидани шаҳру деҳот тадбирҳои муҳим амалӣ карда мешаванд.

Раҷаббой Аҳмадзода ҳамзамон илова намуд, ки чун дигар шаҳру навоҳӣ дар Бӯстон низ ба истиқболи 30-солагии Истиқлоли давлатии Ҷумҳурии Тоҷикистон силсилаи иншооти гуногуни иҷтимоӣ бунёду мавриди истифода қарор гирифта истодааст ва бо таъсиси иншооти нав ҷойҳои корӣ афзуда, дар натиҷа сатҳи зиндагии мардум беҳтар мегардад.

Бояд тазаккур дод, ки кӯчаи ба номи Нурулло Ҳувайдуллоев ва қисман кӯчаи ба номи Бобоҷон Ғафуров дар доираи корҳои ободониву созандагӣ ба истиқболи 30-солагии Истиқлоли давлатии Ҷумҳурии Тоҷикистон бо маблағгузории мақомоти иҷроияи ҳокимияти давлатии вилоят мумфарш мешавад.