СУТ ШУМОРАИ ОДАМОНИ ДОРОИ ПОДТАНҲОИ (АНТИТЕЛАҲОИ) ЗИДДИ КОРОНАВИРУСРО ЭЪЛОМ КАРД. Натиҷаҳо имкон намедиҳанд, ки ҳоло дар бораи ноил шудан ба масунияти дастаҷамъӣ ҳарф бизанем

ДУШАНБЕ, 01.03.2021 /АМИТ «Ховар»/. Корманди калони илмии Созмони умумиҷаҳонии тандурустӣ (СУТ) Сумия Сваминатан эълом кард, ки камтар аз 10 фоизи аҳолии кураи Замин дорои подтанҳои (антителаҳои) (сафедаҳои курашакли плазмаи хун) зидди коронавирус мебошад. Тавре АМИТ «Ховар» иттилоъ медиҳад, дар мусоҳибаи дар саҳифаи Твиттери СУТ нашршуда вай гуфтааст, ки созмон таҳқиқотеро, ки зимни онҳо манбаъҳои сироят дар баъзе шаҳрҳои ҷаҳон таҳлил мешаванд, назорат мекунад.

Ба гуфтаи Сваминатан, натиҷаҳо ҳанӯз имкон намедиҳанд дар бораи ҳосил шудани масунияти дастаҷамӣ, ки ноил шудан ба он танҳо бо роҳи эмгузаронӣ бо ваксина имкон дорад, суҳбат кунем.

Дар ҳамин ҳол вай илова кард, ки дар баъзе ҷойҳо, хусусан дар шаҳрҳое, ки  аҳолии онҳо зиёд аст, тақрибан 50-60 фоизи сокинонашон сироят ёфтаанд ва дорои подтанҳо мебошанд.

Агар сокинони ин минтақаҳо, ки дорои подтанҳо намебошанд, ба ҷойҳое бираванд, ки сатҳи масунияти дастаҷамӣ нисбат ба шаҳри худи онҳо поинтар бошад, пас онҳо метавонанд сироят ёбанд, шарҳ дод коршинос.

Свамината чунин хулоса баровард, ки барои ҳамин СУТ таваҷҷуҳро ба механизми байналмилалии дастрасӣ ба ваксинаҳои COVAX ҷалб мекунад, то ин ки «ҳамаи кишварҳо ваксина дошта бошанд ва ҳарчи зудтар эмгузарониро анҷом бидиҳанд».

190 кишвар ва иқтисод дар COVAX иштирок мекунанд. Мутобиқи шартҳои барнома, кишварҳои дорои даромади баланд маблағи харидории ваксинаро барои кишварҳои камдаромад пардохт мекунанд.

Питер Бен Эмбарек, роҳбари гурӯҳи коршиносони байналмилалии СУТ, ки пайдоиши коронавирусро дар Вуҳан омӯхта буд, қаблан дар бораи 13 гунаи (штамми) коронавирус дар шаҳр дар соли 2019 нақл карда буд.

 АКСИ: РИА «Новости»