Таркиши навбатӣ дар Кобул боиси маҷрӯҳ шудани 15 нафар гардид

ДУШАНБЕ, 16.03.2021 /АМИТ «Ховар»/. Полиси Кобул бо интишори як хабарнома иттилоъ додааст, ки нимаи дуюми рӯзи 15 март дар як автомашинаи мусофирбарӣ дар Кобул таркиш рух дод, ки дар натиҷа 15 ғайринизомӣ маҷрӯҳ шуданд, хабар медиҳад АМИТ «Ховар» бо истинод ба сомонаи  шабакаи телевизионии «Tolo News».

Дар ин хабарномаи омадааст, ки ин воқеъа тақрибан соати 15:50 дақиқа дар минтақаи Даҳани Боғи ноҳияи дуввуми шаҳри Кобули Афғонистон рух дод ва як автомашинаи тамғаи «Кастер», марбути вазорати алоқаи Афғонистон ҳадафи ҳамлаи ифротгароён қарор гирифт.

Маҷрӯҳон барои табобат ба беморхона интиқол дода шуданд, илова шудааст дар хабарнома.

Тавре дирӯз АМИТ «Ховар» бо истинод ба сомонаи «Ariana News» хабар дода буд, 14 март низ дар Кобул ду таркиш рух дод, ки дар натиҷа се ғайринизомӣ кушта ва 12 тани дигар захмӣ шуданд, ки ҳамаи онҳо мардуми одии ин кишвар мебошанд.

Дар ҳамин ҳол, хонаводаҳои қурбониён ҳукумат, махсусан сохторҳои амниятиро ба он айбдор мекунанд, ки амнияти мардумро таъмин кардан наметавонанд ва ҳодисаҳои мудҳишро пешгирӣ намекунанд.

То ба ҳол ҳеҷ гурӯҳе, аз ҷумла «Толибон» (мамнӯъ дар Тоҷикистон), масъулияти таркишҳоро ба дӯш нагирифтааст.