Вазорати дифои Афғонистон аз кушта шудани 134 ҷангҷӯи “Толибон” хабар дод

ДУШАНБЕ, 09.03.2021 /АМИТ «Ховар»/. Вазорати дифоъи миллии Афғонистон изҳор намудааст, ки дар задухӯрдҳо байни низомиёни неруҳои афғон ва «Толибон» (мамнӯъ дар Тоҷикистон) дар даҳ вилоят 134 ҷангҷӯ кушта шудаанд, хабар медиҳад АМИТ «Ховар» бо истинод ба сомонаи «Садои Амрико» дар Афғонистон www.darivoa.com.

Фавод Амон, муовини сухангӯи ин вазорат, рӯзи сешанбе, 9 март ба «Садои Амрико» гуфтааст, ки ҳамчунон дар 24 соати гузашта  65 ҷангҷӯи толиб маҷрӯҳ шуданд.

Ҷаноби Амон илова кардааст, ки дар байни афроди кушташудаи “Толибон” панҷ саргурӯҳ низ буданд, ки дар вилоятҳои Зобул, Кобул, Форёб, Балх, Ҳилманд, Фароҳ, Ғазнӣ, Ҳирот ва Қандаҳор кушта шуданд.

Вай афзуд, ки неруҳои амниятии Афғонистон дар ҷараёни амалиёт 59 минаи гузоштаи “Толибон” -ро ошкор ва безарар карданд.

Муовини сухангӯи вазорати дифоъи Афғонистон афзуд, ки дар тӯли 24 соати гузашта “Толибон” як қатор амалиётҳои зидди амниятиро анҷом доданд, аз ҷумла «ҳамлаҳои ногаҳонӣ, тирпаррони бо аслиҳаи вазнин ва сабук, террор, камингузориҳо ва минахобонӣ».

Оқои Амон таъкид кард, ки аксари ҳамлаҳои “Толибон” аз сӯи низомиёни афғон пас зада шуданд.

“Толибон” ҳанӯз дар ин маврид изҳори назар накардаанд.