Чанд нафар ҷангҷӯён ва фармондеҳони «Толибон» дар натиҷаи таркиши маводи дастсози худашон ҳалок ва захмӣ шуданд

ДУШАНБЕ, 26.04.2021 /АМИТ «Ховар»/. Мақомоти маҳаллии  Ҳироти Афғонистон аз таркиш дар як захирагоҳи маводи таркандаи «Толибон» (мамнӯъ дар Тоҷикистон) дар вилоят хабар медиҳанд. Дафтари матбуоти волии Ҳирот рӯзи якшанбеи 25 апрел бо пахши як изҳорот гуфт, ки ин ҳодиса дар вулусволии Паштун Зарғуни Ҳирот рух додааст, хабар медиҳад АМИТ «Ховар» бо истинод ба сомонаи рӯзномаи «8 Субҳ» 8am.af.

Дар изҳорот омадааст, ки «Шуморе аз ҷангҷӯён ва фармондеҳони «Толибон», ки дар масҷид машғули сохтани минаҳо буданд дар натиҷаи таркиши маводи дастсози худашон кушта ва захмӣ шуданд».

Бино ба иттилои манбаъҳои мардумӣ, ин ҳодиса дар масҷиди рустои Морободи вулусволии Паштун Зарғун рӯй додааст ва дар ин захирагоҳи маводи тарканда «Толибон» барои маргталабон воскатҳо (камзӯлҳо) месохтанд.

Мақомоти маҳаллии Ҳирот шумораи талафоти «Толибон» -ро шарҳ надодаанд, аммо ба ривояти манобеъи мардумӣ баъзе аз аъзои гурӯҳи «Толибон», ки «барои машваратдиҳӣ дар бораи сохтани воскатҳо барои маргталабон» дар он ҷо ҳузур доштанд, дар ин таркиш кушта шуданд.

То ҳол «Толибон» дар бораи таркиш дар анбори маводи тарканда ва шумораи қурбониён чизе нагуфтаанд.

Вулусволии Паштун Заргун дар шимолу шарқи Ҳирот ҷойгир аст ва рӯзҳои охир шоҳиди задухӯрдҳои шадиди «Толибон» ва неруҳои амниятӣ шудааст. Баъзе сокинони ноҳия аз эҳтимоли ишғоли он аз тарафи «Толибон» ҳушдор медиҳанд.