Дар 12 рӯзи охир бар асари ҳамлаҳои «Толибон» дар Афғонистон 63 ғайринизомӣ кушта ва 180 нафари дигар захмӣ шуданд

ДУШАНБЕ, 26.04.2021 /АМИТ «Ховар»/. Маълумоте, ки ҳамарӯза ба «TOLOnews» мерасад, нишон медиҳад, ки сатҳи хушунат пас аз эълони хуруҷи қӯшунҳои хориҷӣ аз Афғонистон афзоиш ёфтааст. Дар гузориши «TOLOnews», ки 25 апрел  интишор ёфтааст, танҳо дар 12 рӯзи охир 112 тан аз неруҳои интизомӣ ва қудратии Афғонистон кушта ва 76 нафари дигар дар набардҳо ва ҳодисаҳои зидди амниятӣ маҷрӯҳ шуданд, хабар медиҳад АМИТ «Ховар» бо истинод ба шабакаи телевизионии tolonews.com.

Дар ҳамин ҳол, Вазорати корҳои дохилӣ иддао мекунад, ки дар ҳамин муддат дар ҳамлаҳои «Толибон» (мамнӯъ дар Тоҷикистон) 63 ғайринизомӣ кушта ва 180 нафари дигар захмӣ шудаанд.

Омори ба «TOLOnews» расида нишон медиҳанд, ки сатҳи хушунат пас аз эълони хуруҷи қӯшунҳои хориҷӣ аз Афғонистон афзоиш ёфтааст.

Чунончи, Кобул шабонарӯзи гузашта шоҳиди як ҳодисаи террори ҳадафманд ва як қатл дар вулусволии Пағмон буд.

Фавод Амирӣ, корманди Дастгоҳи президент шабона дар деҳаи Хоҷа Мусофири вулусволии Пағмон, вақте ба сӯи масҷид равон буд, кушта шуд.

Аз вилояти Майдон Вардак низ хабар расид, ки дар натиҷаи таркидани норинҷаки миномёт дар вулусволии Сайидобод ва ҳамлаи ҳавоӣ дар вулусволии Ҷалрез даҳ сокини осоишта кушта шуданд.

Шарифуллоҳ Ҳӯтак, узви Шӯрои вилояти Майдон Вардак гуфт: «Ҳашт узви як оила дар ҳамлаи ҳавоӣ ба деҳаи Заруланги Ҷалрез ва дар ҳодисаи дигар дар вулусволии Сайидобод чаҳор узви як оила дар ҳамлаи ҳангоми ифтор бар асари таркидани норинҷаки миномёт кушта ва се нафари дигар маҷрӯҳ шуданд».

Вазорати корҳои дохилӣ «Толибон»-ро дар талафоти ғайринизомиён гунаҳгор медонад ва мегӯяд, ки ин гурӯҳ иродаи сулҳ надорад.

Сухангӯи вазорати корҳои дохилӣ Ториқ Орин изҳор дошт: «Дар тӯли даҳ рӯзи ахир беш аз 200 ҳамватани мо шаҳид ва захмӣ шуданд».

«Ягона роҳи ҳал ин аст, ки музокироти байнулафғонӣ оғоз шаванд, бо ҳам бинишинанд ва як роҳи ҳал пайдо кунад», — гуфт Ҷовид Софӣ, узви Маҷлиси намояндагон.

Аммо «Толибон» масъулияти талафоти ғайринизомиёнро рад мекунанд ва мегӯянд, ки ҳамлаҳои ҳавоӣ, партоби норинҷакҳои миномётҳо ва мушакҳоро неруҳои ҳукуматӣ анҷом додаанд.