ФУТБОЛ. Замони бозиҳои Лигаи якуми Тоҷикистон муайян гардид

ДУШАНБЕ, 14.04.2021 /АМИТ «Ховар»/. 13 апрел дар Федератсияи футболи Тоҷикистон маросими қуръакашии тақвими бозиҳои чемпионати кишвар байни дастаҳои Лигаи аввал баргузор шуд. Дар ин бора шореҳи варзиши АМИТ «Ховар» Меҳрони Қурбон бо истинод ба Федератсияи футболи Тоҷикистон иттилоъ медиҳад.

Дар мавсими нави Лигаи якуми Тоҷикистон, ки он аз ду давр иборат мебошад, 12 даста, аз ҷумла «Регар-ТадАЗ»-и  шаҳри Турсунзода, «Панҷшер»-и ноҳияи  Ҷалолиддин Балхӣ, «Саройкамар»-и ноҳияи Панҷ, «Исфара»-и  шаҳри Исфара, «Барқчӣ»-и шаҳри Ҳисор, «Ваҳдат»-и шаҳри Ваҳдат, «Ҳулбук»-и ноҳияи Восеъ, «Моҳир»-и ноҳияи  Ёвон, «Равшан»-и ноҳияи  Зафаробод, «Ҳосилот»-и  ноҳияи  Фархор, «Динамо»-и шаҳри Душанбе  ва «Пахтакор»-и ноҳияи  Ҷаббор Расулов ширкат меварзанд.

Тибқи низоми Бергер, дар даври аввали Лигаи якуми Тоҷикистон  24-25 апрел инҳо вомехӯранд:

«Ҳосилот» (Фархор) – «Равшан» (Зафарабад)

«Барқчӣ» (Ҳисор) – «Ваҳдат» (Ваҳдат)

«Пахтакор» (Ҷаббор Расулов) – «Панҷшер (Ҷалолиддин Балхӣ)

«Саройкамар» (Панҷ) – «Регар-ТадАЗ» (Турсунзода)

«Исфара» (Исфара) – «Динамо» (Душанбе)

«Ҳулбук» (Восеъ) – «Моҳир» (Ёвон)

Ёдовар мешавем, ки чемпионати Тоҷикистон байни дастаҳои Лигаи аввал дар мавсими соли 2021 аз 24 апрел оғоз меёбад. Тибқи низомнома, ду дастаи беҳтарини охири мавсим ҳуқуқи соли оянда дар Лигаи олии Тоҷикистон бозӣ кардан доранд.