«ПАРВОЗИ БАЛАНДУ ШАҲПАРИ МО ВАТАН АСТ…». 120 нафар ҷавонони шаҳри Ҳисор ба хизмати ҳарбӣ сафарбар гардиданд

ДУШАНБЕ, 02.04.2021 /АМИТ «Ховар»/. 120 нафар ҷавонони шаҳри Ҳисор  ихтиёран ба сафи Қувваҳои  Мусаллаҳи Ҷумҳурии Тоҷикистон сафарбар гардиданд. Дар маросими гусели наваскарон ба сафи Қувваҳои Мусаллаҳи Ҷумҳурии Тоҷикистон, ки дар Қасри фарҳанги шаҳр доир  гардид, роҳбарони шаҳр ва падару модарони наваскарон иштирок карданд.

Раиси шаҳри Ҳисор Шарифҷон Ҷумъазода изҳор дошт, ки «ихтиёран ба хизмат ҳозир шудани шумо, ҷавонони ғаюру ватандӯст бозгӯи он аст, ки   анъанаҳои неки аҷдодӣ, қаҳрамонию ҷоннисориҳои падарону бобоёнро дар роҳи ҳифзи хоки Ватан, таъмини сулҳу субот ва  истиқлоли давлатӣ чун вориси арзанда идома мебахшед ва ҳимояи Ватанро муқаддас мешуморед. Ҷавонони шаҳр имрӯз омодаанд дар иҷрои қарзи шаҳрвандии худ барои дигарон намунаи ибрат бошанд».

Дар маросими гусели наваскарон  ба онҳо дар роҳи ҳифзи марзу буми кишвар, дастовардҳои истиқлоли давлатӣ, таъмини сулҳу оромӣ ва содиқона хизмат намудан ба Модар-Ватан далериву шуҷоатмандӣ  таманно намуданд.

Зикр шуд, ки Ватан беҳтарин меодгоҳ буда, ҳифзи он муқаддас ва баробар ба дӯст доштану эҳтиёт кардани Модар мебошад:

Эй дӯст биё, ки раҳбари мо Ватан аст,
Парвози баланду шаҳпари мо Ватан аст.
Ғамхораи мо нест ба ҷуз ишқи Ватан,
Болида биё, ки модари мо Ватан аст.

Акс аз мақомоти иҷроияи ҳокимияти давлатии шаҳри Ҳисор