Раиси Шӯрои уламои вилояти Тахори Афғонистон дар натиҷаи таркиш кушта шуд

ДУШАНБЕ, 01.03.2021 /АМИТ «Ховар»/. Сухангӯи полиси вилояти Тахори Афғонистон Халил Асир 31 март иттилоъ додааст, ки Абдул Самад Муҳаммадӣ, раиси Шӯрои уламои вилоят, нимаи дуюми рӯз дар шаҳри Толуқон ҳангоми таркиши минаи магнитӣ дар автомашинааш кушта шудааст, хабар медиҳад АМИТ «Ховар» бо истинод ба шабакаи телевизионии tolonews.com.

Вай афзуд, ки ин ҳодиса тақрибан соати 13.30 дар чорроҳаи дуввуми шаҳри Толуқон рух додааст.

Тибқи иттилои манбаъ, дар натиҷаи таркиш се нафари дигар захмӣ шудаанд.

Инчунин “Тулӯъ Нюс” бо истинод ба сухангӯи полиси Балх Одилшоҳ Одил иттилоъ додааст, ки 31 март дар вулусволии Балхи ин вилоят бар асари таркиши мина ду ғайринизомӣ, аз ҷумла як кӯдак кушта ва 16 шаҳрванд, аз ҷумла се хизматчии низомӣ маҷрӯҳ шуданд.

Вай афзудааст, ки ин ҳодиса ҳангоми таркиши минаи дар ароба ҷойсозишуда дар маҳаллаи Бандари Кулфат, маркази вулусволии Балх рух дод.

Ҳеҷ гурӯҳе, аз ҷумла «Толибон» (мамнӯъ дар Тоҷикистон), масъулияти таркишҳоро ба дӯш нагирифтааст.