Ширкати «Serba Dinamik Holding Berhad»-и Малайзия тасмим дорад дар Тоҷикистон Донишгоҳи технологияи иттилоотӣ таъсис диҳад

Апрель 16, 2021 10:31

ДУШАНБЕ, 16.04.2021 /АМИТ «Ховар»/. Роҳбарияти ширкати «Serba Dinamik Holding Berhad» ният дорад, ки бо иҷозати мақомоти Тоҷикистон ҳамчун макони омӯзиши таҷрибаи фаъолияти пешсафи ин ширкат ба шаҳрвандони тоҷик Донишгоҳи технологияи иттилоотӣ таъсис диҳад. Дар сурати пазируфта шудани ин пешниҳоди ширкат аз ҷониби Тоҷикистон маблағгузорӣ барои сохтмон ва фаъолияти минбаъдаи онро ширкат ба зиммаи худ гирифта, низоми таҳсил ва мудирияти донишгоҳ мувофиқ ба стандартҳои байналмилалӣ ва ҷавобгӯ ба талаботи қонунгузории Тоҷикистон амалӣ карда мешавад. Ин нуктаро 14 апрел ҷонишини Президенти ширкати «Serba Dinamik Holding Berhad»-и Малайзия Муҳаммад Акил зимни мулоқот бо Вазири маориф ва илми Ҷумҳурии Тоҷикистон Муҳаммадюсуф Имомзода баён дошт.

Дар ин бора ба хабарнигори АМИТ «Ховар» аз маркази матбуоти Вазорати маориф ва илми Ҷумҳурии Тоҷикистон иттилоъ доданд.

Ҳамчунин дар вохӯрӣ масъалаҳои ташкили квотаҳо барои шаҳрвандони Тоҷикистон ҷиҳати таҳсил дар донишгоҳҳои Малайзия аз ҷониби ин ширкат ва ба ин васила, саҳмгузорӣ дар рушди соҳаи маориф, илм ва иқтисоди Ҷумҳурии Тоҷикистон баррасӣ шуд.

Зимни суҳбат зикр гардид, ки миёни ҳукуматҳои Малайзияю Тоҷикистон Созишномаи ҳамкорӣ барои солҳои 2014-2023 ва миёни Вазорати маориф ва илми Ҷумҳурии Тоҷикистон ва ду донишгоҳи кишвари Малайзия шартномаи ҳамкорӣ ба имзо расонида шудааст. Робитаҳои дӯстонаву дипломатӣ миёни Тоҷикистон ва Малайзия сабаб гардиданд, ки дар соҳаҳои гуногуни фаъолият миёни ҳарду давлат табодули таҷрибаи мутақобили судманд анҷом ёбад.

Муҳаммадюсуф Имомзода зикр кард, ки робитаҳо дар соҳаи маориф ва илм дар доираи созишномаҳои ҳамкории байниҳукуматӣ бояд тақвият ёбанд ва Вазорати маориф ва илми Ҷумҳурии Тоҷикистон барои густариш ёфтани ин робитаҳо чораҳои судманд роҳандозӣ менамояд.

Ҷонишини Президенти ширкати «Serba Dinamik Holding Berhad»-и Малайзия Муҳаммад Акил иброз дошт, ки қаблан бо вазирони иқтисод ва савдо, саноат ва технологияҳои нави Тоҷикистон вохӯрӣ дошт ва аз натиҷаи ин вохӯриҳо қаноатманд аст. Ӯ бо умедворӣ афзуд, ки мулоқот бо Вазири маориф ва илм низ барои ҳарду тараф аз манфиат холӣ нахоҳад буд.

Мавсуф зикр кард, ки ширкати «Serba Dinamik Holding Berhad»-и Малайзия яке аз ширкатҳои бонуфузи ин давлат ба ҳисоб рафта, ҳоло дар 25 кишвари ҷаҳон фаъолияти худро дар самтҳои технологияи иттилоотӣ, неругоҳҳои барқӣ, иқтисоди рақамӣ, сохтмон ва ғайра ба роҳ мондааст. Ҳамзамон он таҷрибаи таъсиси донишгоҳҳо дар дигар кишварҳои хориҷиро дошта, дар ин самт низ ба дастовардҳои назаррас ноил гаштааст.

Апрель 16, 2021 10:31

Хабарҳои дигари ин бахш

Дар Хатлон даври дуюми Озмуни ҷумҳуриявии «Тоҷикистон-Ватани азизи ман» оғоз ёфт
ИҶЛОСИЯИ 44-УМИ КУМИТАИ МЕРОСИ ҶАҲОНИИ ЮНЕСКО ИДОМА ДОРАД. 16 иншооти Тоҷикистон чун номзад барои шомилшавӣ ба Феҳристи мероси ҷаҳонии ЮНЕСКО пешниҳод шудаанд
Хонандаи тоҷик дар Олимпиадаи ҷаҳонӣ аз фанни биология (IBO-2021) соҳиби медали биринҷӣ гардид
Миёни Донишгоҳи давлатии Бохтар ва Донишгоҳи Тирмиз созишномаи ҳамкорӣ ба имзо расид
Дар Қароргоҳи ЮНЕСКО, Беларус ва Амороти Муттаҳидаи Арабӣ Рӯзҳои фарҳанги Тоҷикистон баргузор мегарданд
«Танҳо донишҳои зеҳнӣ ва фарҳанги техникӣ метавонанд ба муқобили ақидаҳои хурофотию ифротӣ сипар шаванд»,-бардошт аз Слёти геологҳои ҷавон
Новобаста ба пандемия ва авзои амниятии Афғонистон беш аз 125 ҳазор нафар сайёҳони хориҷӣ аз Тоҷикистон боздид карданд
Зиёда аз 200 нафар хонандагони мактабҳои Хоруғ дар лагерҳои академӣ ба таълиму истироҳат фаро гирифта шудаанд
Дар МД «Сафина» бинобар пандемия баргузории барномаҳои озмунӣ ва шоу-барномаҳо мавқуф гузошта шуд
Нуриддин Саид: Фарогирии аҳолӣ бо барномаҳои шабакаҳои давлатии телевизион дар пахши рақамӣ 72 фоизро ташкил медиҳад
Дар Донишкадаи давлатии фарҳанг ва санъати Тоҷикистон кафедраи «Технологияи ВАО» таъсис ёфт
Дар Донишкадаи давлатии забонҳои Тоҷикистон 524 нафар шаҳрвандони хориҷӣ таҳсил мекунанд

Маводҳои таҳлилӣ