Имрӯз дар бисёр кишварҳои ҷаҳон, аз ҷумла Тоҷикистон Рӯзи меҳнат таҷлил карда мешавад

ДУШАНБЕ, 01.05.2021  /АМИТ «Ховар»/. Имрӯз дар бисёр кишварҳои ҷаҳон, аз ҷумла дар Тоҷикистон Рӯзи меҳнат таҷлил карда мешавад. Қаблан ин идро Рӯзи байналмилалии ҳамраъйии коргарон меномиданд.

То пошхӯрии ИҶСШ, дар Тоҷикистон ба шарафи ин рӯз намоишҳои коргарон, аз қабили аёдати ҳамдигар ва баромадан ба саҳро ҷиҳати таҷлили ин ҷашн доир мешуданд. Аз соли 1990 инҷониб намоишҳо гузаронида намешаванд. Тайи солҳои Истиқлоли давлатӣ ҳамасола дар ин рӯз ярмаркаҳои хӯрокворӣ ва гаштугузорҳои оммавӣ дар боғҳо ташкил карда мешаванд.

Соли 2016 вакилони Маҷлиси намояндагони Маҷлиси Олии Ҷумҳурии Тоҷикистон ислоҳоти пешниҳодкардаи Ҳукуматро ба Қонун «Дар бораи рӯзҳои истироҳат» тасдиқ карданд. Тибқи он 1 май дар ҷумҳурӣ бидуни рӯзи истироҳат таҷлил карда мешавад. Меҳнаткашони Тоҷикистон идро дар ҷои кор ҷашн мегиранд.

Бори аввал Рӯзи байналмилалии ҳамраъйии коргарон соли 1890 дар Австрия-Венгрия, Белгия, Германия, Дания, Испания, Италия, ИМА, Норвегия, Франсия, Шветсия ва баъзе дигар кишварҳо таҷлил карда шуд.

Муддати тӯлонӣ якуми май рамзи инқилоб, муборизаи оштинопазири синфӣ буд, тобиши сиёсӣ дошт ва бо намоишҳои дорои портретҳои ороишёфтаи сиёсатмадорон, пешвоёни истеҳсолот, шиорҳо, даъватҳо, плакатҳо ва диаграммаҳо дар бораи дастовардҳо дар ин ё он соҳаи хочагии халк, илм ва маданият таҷлил мешуд.

Имрӯз ин ид дар 142 кишвар ҳамчун 1 май ё душанбеи аввали моҳи май таҷлил карда мешавад.