Иштирокчии ҷанг, сокини ноҳияи Қӯбодиён Мамат Тошматов низ аз кумаки Пешвои миллат баҳраманд гардид

ДУШАНБЕ, 06.05.2021 /АМИТ «Ховар»/. Иштирокчии Ҷанги дуюми ҷаҳон (солҳои 1941-1945), истиқоматкунандаи деҳаи Миршикори ҷамоати деҳоти ба номи Э.Ниёзови ноҳияи Қӯбодиёни вилояти Хатлон Мамат Тошматови 95-сола ҳам аз кумакпулии Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баҳраманд гардид.

Тавре аз мақомоти иҷроияи ҳокимияти давлатии ноҳияи Қӯбодиён ба АМИТ “Ховар” хабар доданд, сардори Хадамоти муҳоҷирати Вазорати меҳнат, муҳоҷират ва шуғли аҳолӣ  Тоҳир Каримзода  бо намояндагони мақомоти иҷроияи  ноҳияи мазкур ба аёдати  Мамат Тошматов рафта,  маблағи 10 ҳазор сомонӣ -кумакпулии якдаъфаинаи Пешвои миллат муҳтарам Эмомалӣ Раҳмонро ба он кас супориданд.

Иштирокчии ҶДҶ  Мамат Тошматов барои чунин ғамхорию қадршиносӣ ба Пешвои миллат муҳтарам Эмомалӣ Раҳмон  изҳори сипос намуда, зикр  кард, ки аз ин иқдоми наҷиб  ниҳоят хушҳол ва фараҳманд аст, зеро пас аз ин гуна таваҷҷуҳи  Сарвари давлат ва Ҳукумати мамлакат кас худро  танҳою нотавон  эҳсос намекунад.

Мамат Тошматов  барои пояндагии   сулҳу ваҳдати миллӣ  ва осоиштагии ҷовидонаи Тоҷикистон, муваффақиятҳои беназир ва барори кор  дар фаъолияти  Пешвои миллат даст ба дуо бардошта, насли наврасро ба дӯст доштани Ватан ва хизмати содиқона кардан ба миллат  даъват намуд.

Мамат Тошматов ҳамчунин  дар ҳаққи  сарбозоне, ки охири моҳи апрел дар шаҳри Исфара  барои  дифоъ аз марзу буми Ватан ҷони худро фидо карданд,  дуои хайр намуда, иброз дошт, ки  корнамоии ин фарзандони ҷасури Ватан дар хотираҳо абадан боқӣ мемонад.