Путин дастур дод, ки қоидаҳои гардиши силоҳро шадидтар кунанд

ДУШАНБЕ, 12.05.2021 /АМИТ «Ховар»/. Пас аз тирандозӣ дар мактаби Қазон президенти Россия Владимир Путин дастур дод, ки масъалаи шадидтар кардани қоидаҳои гардиши силоҳи шаҳрвандиро фавран дида бароянд. Тавре АМИТ «Ховар» иттилоъ медиҳад, дар ин бора ТАСС бо истинод ба котиби матбуоти президент Дмитрий Песков хабар дод.

«Ба [сардори Гвардияи Россия Виктор Золотов] дастури алоҳида дода шуд, ки фавран тартиби нав дар бораи намудҳои силоҳе, ки метавонанд дар гардиши шаҳрвандӣ бошанд, таҳия карда шавад», — гуфт Песков ба хабарнигорон.

Песков тавзеҳ дод, ки «баъзан навъҳои силоҳи сабук, ки дар бархе  кишварҳо ҳамчун милтиқ ва ғайра истифода мегарданд, чун аслиҳаи шикорӣ ба қайд гирифта мешаванд». «Инро низ Гвардияи Россия фавран таҳия хоҳад кард», — гуфт ӯ.

Вакили Думаи давлатӣ, мушовири роҳбари Гвардияи Россия Александр Хинштейн дар канали Telegram-и худ гуфт, ки тирандоз каме пеш аз ҳамла иҷозаи нигоҳ доштани силоҳи оташфишон гирифтааст. «Иҷозати нигаҳдории силоҳи оташфишон (таппончаи Hatsan escort PS) ба Илназ Галявиев танҳо дар арафаи фоҷиа, 28 апрел дода шуд», — навиштааст ӯ.

Ёдовар мешавем, ки субҳи 11 май дар мактаби рақами 175-и Қазон ҳамлагар аз автомат оташ кушод. Баъдтар ӯро боздошт карданд. Маълум гардид, ки ӯ ҷавони 19-сола буда, силоҳ дар номаш расман ба қайд гирифта шудааст. Тибқи иттилои расмии охирини Кумитаи миллии зиддитеррористӣ, ҳафт кӯдак, ду омӯзгор кушта ва 21 нафар аз шумули донишҷӯёну кормандони муассисаи таълимӣ маҷруҳ шуданд.

Дар ибтидо гузориш дода шуд, ки ҳамлагарон ду нафар буданд. Яке аз онҳоро боздошт карданд ва дуюмӣ гӯё ҳангоми ҳамла кушта шуд. Тасдиқи расмии иттилоот дар бораи ҳамлагари дуюм вуҷуд надорад.

12 май дар Тотористон рӯзи мотам эълон шудааст. Дар ин рӯз дарсҳо дар ҳама мактабҳои Қазон лағв карда мешаванд.