Варзишгарони тоҷик дар марафони Иcсиқкӯл сазовори ду медали биринҷӣ шуданд

ДУШАНБЕ, 18.05.2021 /АМИТ «Ховар»/. Дар шаҳри Чолпон-Отаи Қирғизистон 9-умин Марафони байналмилалии Иссиқкӯл баргузор шуд. Дар мусобиқаи мазкур давандаҳои тоҷик низ ширкат карда, 5 нафарашон ба гирифтани ҷойҳои намоён мушарраф гардиданд.

Дар марафон бо масофаи 42 км 195 м миёни мардон варзишгари тоҷик Шокирҷон Мамейқулов бо натиҷаи 2:36.58 медали биринҷӣ ва 70 ҳазор сомонӣ ба даст овард. Бахтиёр Уткиров бо натиҷаи 2:36.59 ҷои чорум ва 50 ҳазор сомонӣ гирифт.

Дар ин бора намояндаи расмии Кумитаи миллии олимпии Тоҷикистон Умаралӣ Сафаралӣ ба шореҳи варзиши АМИТ «Ховар» Меҳрони Қурбон хабар дод.

Ҳамчунин дар ниммарафон ба масофаи 21 км 97 м миёни мардон Ҳасанҷон Акбаралиев бо натиҷаи 1:12.48 сазовори медали биринҷӣ ва 20 ҳазор сомонӣ шуд. Меҳробҷон Одинаев бо натиҷаи 1:14.27 ҷои чорум (10 ҳазор сомонӣ), Ғайрат Олимов бо натиҷаи 1:14.40 (7 000 сомонӣ) ҷои панҷумро ишғол карданд.

Хотиррасон мешавем, ки  дар 9-умин Марафони байналмилалии Иссиқкӯл, ки дар ду масофа миёни мардону бонувони синни гуногун доир гардид, 3000 нафар варзишгарон ва дӯстдорони варзиш аз 35 давлат иштирок карданд.

Фонди ҷоизавии мусобиқа 1 миллиону 44 ҳазор сомониро ташкил дод.

                                                                                      Акс аз манбаъҳои боз