Ҳарифони дастаи мунтахаби бонувони Тоҷикистон дар марҳилаи интихобии Ҷоми Осиё-2022 муайян шуданд

ДУШАНБЕ, 25.06.2021 /АМИТ «Ховар»/. Дар қароргоҳи Конфедератсияи футболи Осиё (КФО) дар шаҳри Куала Лумпур қуръакашии марҳилаи интихобии Ҷоми Осиё-2022 миёни дастаҳои мунтахаби бонувон сурат гирифт. Дар ин марҳила 28 даста дар ҳашт гурӯҳ ширкат мекунанд. Дастаи мунтахаби футболи бонувони Тоҷикистон дар гурӯҳи «В» бо дастаҳои мунтахаби Ветнам, Малдив ва Афғонистон бозӣ хоҳад кард.

Дар ин бора шореҳи варзиши АМИТ «Ховар» Меҳрони Қурбон бо истинод ба Федератсияи футболи Тоҷикистон иттилоъ медиҳад.

Бозиҳои дастаи мунтахаби футболи бонувони Тоҷикистон дар гурӯҳи «В» 13-25 сентябри соли равон дар шаҳри Душанбе доир мешаванд.

Мавриди зикр аст, ки  ба марҳилаи финалии Ҷоми Осиё-2022, ки аз 20 январ то 6 феврал дар Ҳиндустон баргузор мешавад, ғолибони 8 гурӯҳ роҳхат мегиранд. Се дастаи беҳтарини Ҷоми Осиё-2018 – Япония, Австралия ва Чин аз марҳилаи интихобӣ озоданд ва мустақим дар марҳилаи финалӣ бозӣ мекунанд.

Натиҷаи қуръакашии марҳилаи интихобии Ҷоми Осиё-2022 миёни тимҳои бонувон:
Гурӯҳи «А»: Тайпэйи Чин (мизбон), Баҳрайн, Туркманистон, Лаос.

Гурӯҳи «В»: Ветнам, Тоҷикистон (мизбон), Малдив, Афғонистон.

Гурӯҳи «С»: ҶХД Корея, Сингапур, Ироқ, Индонезия (мизбон).

Гурӯҳи «D»: Мянма (мизбон), АМА, Гуам, Лубнон.

Гурӯҳи «Е»: Кореяи Ҷанубӣ, Ӯзбекистон, Муғулистон (мизбон).

Гурӯҳи «F»: Филиппин, Ҳонг Конг, Непал (мизбон).

Гурӯҳи «G»: Урдун, Эрон, Бангладеш (мизбон).

Гурӯҳи «Н»: Тайланд, Фаластин, Малайзия.