ОГОҲӢ АГЕНТИИ ОБУҲАВОШИНОСӢ: 27 ва 30 июн дар ғарби вилояти Бадахшон ва ноҳияҳои тобеи ҷумҳурӣ омадани сел аз эҳтимол дур нест

ДУШАНБЕ, 25.06.2021 /АМИТ «Ховар»/. 27 ва 30 июни соли равон дар ғарби Вилояти Мухтори Кӯҳистони Бадахшон ва минтақаҳои алоҳидаи кӯҳии ноҳияҳои тобеи ҷумҳурӣ эҳтимоли  сар задани селҳои пиряхӣ пешгӯӣ мешавад.

Дар ин бора  аз Агентии обуҳавошиносии  Кумитаи ҳифзи муҳити зисти назди Ҳукумати Ҷумҳурии Тоҷикистон ба АМИТ «Ховар» хабар доданд.

Тибқи иттилои манбаъ,  25 ва 26 июни соли равон дар ҷумҳурӣ ҳарорати баланди обу ҳаво метавонад ба пайдоиши нурҳои ултрабунафш (радиатсияи офтобӣ) дар қабати болоии атмосфера мусоидат намояд ва аз соати 12:00 то 15:00  таркиби нурҳои ултрабунафш ба нишондиҳандаҳои баландтар хоҳад расид.

Баландшавии нишондиҳандаҳои нурҳои ултрабунафш дар шаҳри Душанбе, ноҳияҳои марказӣ ва шимолии НТҶ, вилояти Хатлон, вилояти Суғд ва шарқи ВМКБ пешгӯӣ мешавад.

Ҳамчунин  27 ва 28 июн мувофиқи пешгӯиҳо ин вазъият боқӣ мемонад.

Бино ба тавсияи мутахассисон баландшавии сатҳи нурҳои ултабунафш ба касалиҳои пӯст, чашм, фишорбаландӣ, диабети қанд ва нафастангӣ (астма) таъсири манфӣ дорад.

Аз ин рӯ,  ба шаҳрвандон тавсия дода мешавад, ки ҳангоми нисфирӯзӣ аз гаштугузори беҳуда дар фазои кушод худдорӣ намуда, саломатии худ ва наздиконашонро  нигоҳ доранд.