Баҳодур ва Сомон дар Бозиҳои олимпии Токио-2020 бар ҳарифон ғолиб омаданд, Шаббос аз идомаи мусобиқа маҳрум шуд

ДУШАНБЕ, 26.07.2021 /АМИТ «Ховар»/.  25 июл дар Бозиҳои олимпии Токио-2020 ду варзишгари шинохтаи  тоҷик аз намуди бокс – Баҳодур Усмонов ва Шаббос Негматуллоев муҳориба карданд.

Баҳодур Усмонов дар вазни -63кг ба муқобили варзишгар аз Доминикан Леонел Сантос Нунез ба ринг баромада, бо ҳисоби 4:1 пирӯз шуд. Акнун ӯ дар даври 1/8-финал бо ғолиби ҷуфти Чинзогир Баатарсух (Муғулистон) / Элнур Абдураҳимов (Ӯзбекистон) вомехӯрад.

Шаббос Негматуллоев дар вазни -81кг бо варзишгари Чин Даксиан Ченг муҳориба карда, бо ҳисоби 0:4 шикаст хӯрд ва аз идомаи рақобатҳо маҳрум гардид.

Дар ин бора намояндаи расмии Кумитаи миллии олимпии Тоҷикистон Умаралӣ Сафаралӣ ба шореҳи варзиши АМИТ «Ховар» Меҳрони Қурбон хабар дод.

Имрӯз,  26 июл Сомон Маҳмадбеков аз намуди гӯштини дзюдо  дар   вазни -73кг  хеле ҳунари хуб нишон дода,    рақобати аввалини худро дар Бозиҳои олимпии Токио- 2020   бо ғалаба оғоз намуд. Сомон бар ҳарифи дуюми  худ — Аҳмад Аликай аз дастаи гурезаҳо дастболо шуда, ба даври сеюми рақобатҳо роҳхат гирифт.

Хотирнишон месозем, ки  ин  мусобиқа соати 7:00 бо вақти Душанбе оғоз шуда, қувваозмоиҳои финалӣ соати 13:00 шурӯъ мегарданд.

Ёдовар мешавем, ки ба барномаи Бозиҳои олимпии Токио-2020 33 намуди варзиш (50 равияи варзишӣ) ворид гардидаанд. 11 324 нафар варзишгарон давоми 17 рӯз барои 339 маҷмӯи медалҳо талош мекунанд.

Аввалин медали тиллои олимпиро  24 июл варзишгари чинӣ Қиан Йанг дар тирандозӣ аз милтиқи бодӣ дар масофаи 10 метр ба даст овард. Инак, то ҳоло варзишгарони 33 давлат соҳиби медал шудаанд, аз ҷумла намояндагони 13 давлат ба гирифтани медали тиллои Бозиҳои олимпии Токио шарафёб шудаанд.