Дар Боғи Ирам Фестивали хӯрокҳои миллии давлатҳои аъзои СҲШ доир гардид

Июль 16, 2021 18:36

ДУШАНБЕ, 16.07.2021 /АМИТ «Ховар»/. Имрӯз бо ташаббуси Кумитаи рушди сайёҳии назди Ҳукумати Ҷумҳурии Тоҷикистон дар ҳамкорӣ бо Мақомоти иҷроияи ҳокимияти давлатии шаҳри Душанбе ва КВД «Тоҷикдипсервис»-и Вазорати корҳои хориҷӣ дар Муассисаи давлатии Боғи Ирам дар доираи вохӯрии роҳбарони мақомоти сайёҳии давлатҳои аъзои Созмони ҳамкории Шанхай Фестивали хӯрокҳои миллии давлатҳои аъзои Созмони ҳамкории Шанхай баргузор гардид.

Дар фестивал намояндагони Ҳукумати ҷумҳурӣ, роҳбарони вазорату идораҳо, ниҳодҳои сайёҳии давлатҳои аъзои СҲШ, мақомоти иҷроияи ҳокимияти давлатӣ ва корпуси дипломатии муқими Тоҷикистон, сайёҳону сокинони пойтахт иштирок доштанд.

Мақсад аз баргузории Фестивал густариш бахшидани фаъолият дар соҳаи сайёҳӣ, муаррифии анъана ва урфу одатҳои давлатҳои бо ҳам дӯст ва ба ин васила ба ҷаҳониён пешниҳоди хӯрокҳои миллии тоҷикӣ мебошад.

Меҳмонону иштирокчиён аз намоиши театрикунонидашудаи ҳунармандон оид ба оини меҳмондории тоҷикон, хӯрокҳои миллии тоҷикӣ дар наҳорӣ, нисфирӯзӣ ва шомгоҳон, аз ҷумла, оши палав, кабобҳои сабзавотӣ ва гӯштӣ, лӯлакабоб, ҷигарбирён, сихкабоб, мурғбирён, каллапоча, қурутоб, шакароб, таҳмол, оши бурида, оши туппа, маҳсулоти ширӣ, ба монанди ҷурғот, чакка, қурут, равғани зард, маска, рӯи шир, панир, қаймоқ ва дӯғ, ширрӯған, ширбиринҷ, ширбат, ширкаду, ордбирён, хӯришҳои гуногун, меваҳои тару тоза, тарзи пешниҳоди хизматрасонӣ дар ошхонаву тарабхонаҳо, хӯрокҳои миллии давлатҳои аъзои СҲШ ва имконоти сайёҳию ҳунармандӣ боздид намуданд.

Дар маросими кушодавии фестивал роҳбарияти Кумитаи рушди сайёҳӣ ва Вазорати корҳои хориҷӣ сухан карданд.

Зикр гардид, ки ҳар халқ дорои хӯрокҳои миллии худ буда, анъанаҳои таомпазӣ дар тӯли асрҳо ташаккул ёфтаанд, мардум беҳтарин дастурҳоро нигоҳ дошта, ба наслҳои худ мерос мегузоранд.

Таомҳои анъанавӣ бо таърих, дин, расму оинҳо, афсонаҳо ва дигар омилҳо, ки ҳувияти беназири кишвар ё минтақаро ташаккул медиҳанд, робитаи зич доранд.

Аз ҷониби Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон эълон гардидани Солҳои рушди деҳот, сайёҳӣ ва ҳунарҳои мардумӣ ба рушди сайёҳии гастрономӣ заминаи мусоид гузошт. Хӯрокҳои миллии тоҷикӣ аз нав эҳё гашта, сайёҳони дохилию хориҷӣ аз лаззати таомҳои миллӣ баҳра мебаранд.

Мунтазам баргузор намудани фестивалу идҳо, аз ҷумла иди «Оши палав», фестивали «Хӯрокҳо ва пуфакҳои ҳавоӣ», фестивали баҳории хӯрокҳои миллӣ, озмунҳои «Нон шудам, шоистаи ҳар хон шудам», «Хӯришҳои миллӣ», «Яхмос ва обҳои ташнагишикан» ва дигар иду ҷашнҳо, инчунин ба кор оғоз кардани тарабхонаву ошхонаҳо бо унсурҳои миллӣ ба рушди саёҳати гастрономӣ ва ҷалби бештари сайёҳон такони ҷиддӣ бахшиданд. Дар ин замина, хатсайрҳои сайёҳӣ ташкил карда шуда, сайёҳон аз иду фестивалҳо боздид менамоянд ва аз хизматрасонии ошхонаву тарабхонаҳо васеъ истифода мебаранд.

Хӯрокҳои миллии тоҷикӣ дар ҷаҳон машҳур буда, санъати пухтупазии халқи тоҷик дар тӯли садсолаҳо зери таъсири таърихи ғанӣ ташаккул ёфтааст.

Маҳсулоте, ки асоси таомҳои миллии тоҷикон мебошанд, таърихи қадимӣ доранд ва бо ҳар минтақа ва фарҳанги он алоқаманданд. Таомҳои гуногун ва дастархондорию меҳмоннавозии тоҷикӣ сайёҳонро ҳама вақт дар ҳайрат мегузорад.

Имрӯзҳо аз ҷониби Кумитаи рушди сайёҳӣ бо мақсади баланд бардоштани сатҳи хизматрасонӣ дар тарабхонаҳо ва ба меъёрҳои муосир баробар намудани онҳо, бо ҷалби коршиносони милливу байналмилалӣ тадбирҳои зарурӣ роҳандозӣ гардидаанд, ки ин имкон медиҳад сайёҳон аз хизматрасонии муносиб ва меҳмоннавозии тоҷикона баҳравар шуда, саёҳатҳои гастрономӣ боз ҳам рушд кунанд.


Марзия САИДЗОДА,
Тоҳирҷон САИД,
АМИТ «Ховар»

Июль 16, 2021 18:36

Хабарҳои дигари ин бахш

Намояндаи Тоҷикистон дар ҷаласаи Шӯрои сайёҳии кишварҳои узви Иттиҳоди Давлатҳои Мустақил тариқи маҷозӣ иштирок намуд
«ДУШАНБЕ-ШАҲРИ ИМКОНОТИ РУШДИ САЙЁҲИИ УСТУВОР». Таҳти чунин унвон Рӯзи ҷаҳонии сайёҳӣ таҷлил гардид
РОҒУН — МИНТАҚАИ САЙЁҲӢ. Дар ин бора Қарори Ҳукумати Ҷумҳурии Тоҷикистон ба тасвиб расид
Имконияти сайёҳии Тоҷикистон дар ЭКСПО-и сайёҳии Ҷопон муаррифӣ мегардад
Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Қирғизистон Садир Жапаров мулоқот намуданд
Президенти Ҷумҳурии Тоҷикистон Эмомалӣ Раҳмон дар шаҳри Самарқанд дар ҷаласаи Шӯрои сарони давлатҳои аъзои СҲШ иштирок карданд
Идомаи сафари кории Президенти Ҷумҳурии Тоҷикистон Эмомалӣ Раҳмон дар Ҷумҳурии Узбекистон
Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Узбекистон Шавкат Мирзиёев мулоқот намуданд
Президенти Ҷумҳурии Тоҷикистон Эмомалӣ Раҳмон бо Сарвазири Ҷумҳурии Исломии Покистон Шаҳбоз Шариф мулоқот анҷом доданд
Президенти Ҷумҳурии Тоҷикистон Эмомалӣ Раҳмон бо Раиси Ҷумҳурии Исломии Эрон Саид Иброҳим Раисӣ мулоқот карданд
Президенти Ҷумҳурии Тоҷикистон Эмомалӣ Раҳмон бо Раиси Ҷумҳурии Мардумии Чин Си Ҷинпин мулоқот намуданд
Оғози сафари кории Президенти Ҷумҳурии Тоҷикистон Эмомалӣ Раҳмон дар шаҳри Самарқанди Ҷумҳурии Узбекистон

Хабарҳои муҳимтарин