Сироҷиддин Муҳриддин: «То имрӯз ба Тоҷикистон дархост барои фароҳам овардани шароит барои баргузории музокироти байниафғонӣ ворид нашудааст»

ДУШАНБЕ, 27.07.2021 /АМИТ «Ховар»/. «То имрӯз ба Тоҷикистон дархост барои фароҳам овардани шароит барои баргузории музокироти байниафғонӣ ворид нашудааст», — гуфт Вазири корҳои хориҷӣ Сироҷиддин Муҳриддин имрӯз дар нишасти матбуотӣ дар Душанбе.

Ба гуфтаи вай, бояд раванди музокирот барои ҳалли мусолиматомез дар Афғонистон бо тамоми ҷиддият назорат карда шавад. Аммо бо вуҷуди мушкилот, мо ба муваффақияти музокироти Давҳа умедворем. Тоҷикистон ҳамаи платформаҳои дигари муколамаро, ки ба истиқрори сулҳ ва субот дар Афғонистон нигаронида шудаанд, истиқбол мекунад.

«Тоҷикистон ҳамеша таъкид мекунад, ки пайваста бо сохторҳои расмии Афғонистон ҳамкорӣ ва интихоби мардуми дӯсти Афғонистонро дастгирӣ мекунад. Дар сатҳи сиёсӣ, Тоҷикистон ҳеҷ гоҳ бо Толибон робита надоштааст»,-иброз намуд Вазири корҳои хориҷии Тоҷикистон.