Аз замони вуруди Толибон ба Кобул ҳудуди 12 000 нафар Афғонистонро тарк кардаанд

ДУШАНБЕ, 23.08.2021 /АМИТ «Ховар»/.  Аз лаҳзаи ворид шудани ҷангҷӯёни ҳаракати радикалии «Толибон» ба Афғонистон тақрибан 12 000 нафар хориҷиён ва шаҳрвандони ин давлат, ки дар сафоратхонаҳо ва гурӯҳҳои башардӯстонаи байналмилалӣ кор мекарданд, кишварро тарк карданд. Ба иттилои АМИТ «Ховар», дар ин бора рӯзи шанбе хабаргузории Reuters бо истинод ба намояндаи СААШ хабар дод.

«Раванди тахлия суст аст, чун он хатарнок мебошад, зеро мо намехоҳем бо Толибон ва ғайринизомиён дар беруни фурудгоҳ даргириҳо сурат гиранд»,- гуфт ба агентӣ сухангӯи СААШ, ки нахост номаш ифшо шавад.

Ба гузориши хабаргузории Ройтерз, Толибон қаблан даст доштанашон дар вазъияти дар фурудгоҳи Кобул баамаломада ва ошӯбҳоро рад карда буданд. Мақомоти ҳаракат гуфтанд, ки кишварҳои ғарбӣ «метавонистанд нақшаи беҳтари тахлия таҳия кунанд.»

 АКС аз Reuters