Замони баргузории бозиҳои даври ҳаштуми Лигаи касбии футзали Тоҷикистон-2021 муайян шуд

ДУШАНБЕ, 26.08.2021 /АМИТ «Ховар»/. 28 август бозиҳои даври ҳаштуми Лигаи касбии футзали Тоҷикистон-2021   дар толорҳои варзишии мамлакат баргузор мешаванд, ки дар он дастаҳои футзали  «Сипар»-и шаҳри Хуҷанд бо «Соро компания»-и шаҳри Душанбе, «Помир»-и шаҳри  Хоруғ бо  «Истиқлол»-и шаҳри Душанбе ва  «Пойтахт» бо «Самандар»-и шаҳри  Турсунзода миёни ҳам  рақобат мекунанд, хабар медиҳад шореҳи варзиши АМИТ «Ховар» Меҳрони Қурбон бо истинод ба Федератсияи футболи Тоҷикистон.

Чанд рӯз пеш бозиҳои даври ҳафтуми Лигаи касбии футзали Тоҷикистон-2021   баргузор  шуданд. Дар ин давр чемпиони феълии кишвар- дастаи футзали  «Сипар»-и шаҳри Хуҷанд ба дарвозаи дастаи  «Помир»-и шаҳри  Хоруғ 10 голи беҷавоб зад. Дар ҳайати дастаи  «Сипар»-и шаҳри Хуҷанд легионери гурҷистонӣ Нукри Чумбуридзе се тӯб зад ва ё хет-трик анҷом дод. Дастаи футзали  «Соро компания»-и шаҳри  Душанбе низ ба ҳарифаш- дастаи «Самандар»-и шаҳри  Турсунзода ғолиб омада, 13 тӯб вориди дарвозааш намуд. Дар ҳайти дастаи футзали  «Соро компания»-и шаҳри  Душанбе Фирӯз Сангов се тӯб ба нишон расонид.

Дар бозии дигар дастаи футзали  «Истиқлол»-и шаҳри Душанбе  бар дастаи «Пойтахт» бо ҳисоби 3:2 ғолиб омад. Бо шарофати ду голи Самандар Ризомов ва голи Муҳаммадҷони Асламхон  дастаи футзали  «Истиқлол»-и шаҳри Душанбе соҳиби се хол шуд.

Пас аз натиҷагирии 7 даври Лигаи касбии футзали Тоҷикистон-2021 дастаи «Сипар»-и  шаҳри Хуҷанд бо 22 хол пешсаф аст. Дастаи  футзали «Соро компания»-и шаҳри Душанбе, ки 19 хол дорад, дар ҷои дуюм қарор гирифтааст.

                                                                                                                               АКС аз ФФТ