Дар Бадахшон панҷумин мусобиқаи ҷумҳуриявӣ аз намуди бокс миёни наврасону ҷавонон оғоз ёфт

ДУШАНБЕ, 22.09.2021 /АМИТ «Ховар»/. Ба ифтихори 30-солагии Истиқлолияти давлатии Ҷумҳурии Тоҷикистон дар Маҷмааи варзишии шаҳри Хоруғ бо дастгирии Кумитаи кор бо ҷавонон ва варзиши назди Ҳукумати мамлакат ва мақомоти иҷроияи ҳокимияти давлатии Вилояти Мухтори Кӯҳистони Бадахшон мусобиқаи ҷумҳуриявӣ аз намуди бокс миёни наврасону ҷавонон оғоз ёфт. Дар ин бора  сардори Раёсати кор бо ҷавонон ва варзиши вилоят Сураҷ Чоршанбиев ба шореҳи варзиши АМИТ «Ховар» Меҳрони Қурбон хабар дод.

Мусобиқаи мазкур  бо ҳадафи ташвиқу тарғиби тарзи ҳаёти солим, оммавигардонии варзиш, таҳкими ҳамдилию рафоқат байни наслҳои ояндасози кишвар доир гашта, он панҷумин мусобиқаест, ки дар сатҳи ҷумҳурӣ дар ҳудуди вилоят гузаронида мешавад.

Дар мусобиқа варзишгарон аз шаҳри Душанбе, вилоятҳои Суғду Хатлон, Бадахшон ва навоҳии тобеи марказ миёни ҳам рақобат карда, ғолибон бо медалу ифтихорномаҳо қадрдонӣ мешаванд.

                                             АКС аз Кумитаи кор бо ҷавонон ва варзиш