Иштирокчиёни даври нимфинали Лигаи касбии футзали Тоҷикистон-2021 муайян шуданд

ДУШАНБЕ, 28.09.2021 /АМИТ «Ховар»/. Пас аз натиҷагирии бозиҳои даври чорякфинали Лигаи касбии футзали Тоҷикистон-2021 дастаҳои  футболи «Истиқлол»-и шаҳри Душанбе  ва «Пойтахт» ба даври баъдӣ роҳ ёфтанд, хабар медиҳад шореҳи варзиши АМИТ «Ховар» бо истинод ба Федератсияи футболи Тоҷикистон.

Дар бозиҳои дуюми даври чорякфинали  Лигаи касбии футзали Тоҷикистон-2021 дастаи  «Пойтахт»  бар дастаи футзали  «Помир»-и шаҳри Хоруғ  бо ҳисоби калони  6:0, дастаи  футзали  «Истиқлол»-и шаҳри Душанбе  бар дастаи   «Самандар»-и шаҳри Турсунзода  бо ҳисоби калони  5:0 зафар ёфтанд.

Дар нимфинал  дастаи  футзали  «Истиқлол»-и шаҳри Душанбе  бо чемпиони феълии кишвар – дастаи  «Сипар»-и шаҳри  Хуҷанд ва «Пойтахт» бо  дастаи футзали «Соро компания»-и шаҳри  Душанбе  байни ҳам  вомехӯранд.

Дар асоси низомномаи чемпионат даври нимфинал аз силсилаи бозиҳо то ду ғалабаи яке аз дастаҳо иборат аст. Ғолибони даври нимфинал дар финал вомехӯранд, дастаҳои мағлуб барои ҷои сеюм бозӣ мекунанд.

                                                                 АКС аз Федератсияи футболи Тоҷикистон