Бо ташаббуси КИМ ҲХДТ дар ҷамоатҳои ноҳияи Балҷувон марказҳои ҳунарҳои мардумӣ ифтитоҳ гардиданд

Ноябрь 1, 2021 16:22

ДУШАНБЕ, 01.11.2021 /АМИТ «Ховар»/. Бахшида ба 30-солагии Истиқлолияти давлатии Ҷумҳурии Тоҷикистон дар доираи эълони Солҳои рушди деҳот, сайёҳӣ ва ҳунарҳои мардумӣ бо ташаббуси Кумитаи Иҷроияи Марказии Ҳизби Халқии Демократии Тоҷикистон дар ҷамоатҳои «Сари Хосор», «Тоҷикистон» ва «Сайф Раҳим»-и ноҳияи Балҷувон Маркази ҳунарҳои мардумӣ ифтитоҳ гардида, 15 адад мошинаҳои муосири дӯзандагӣ аз номи Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон тақдим шуданд. Дар ин бора АМИТ «Ховар» бо истинод ба маркази матбуот ва таҳлилии дастгоҳи КИМ ҲХДТ иттилоъ медиҳад.

Дар Марказ занони хонашин ва камбизоат метавонанд намунаи ҳунарҳои дӯзандагӣ, попурдӯзӣ, гулдӯзӣ, наққошӣ, чакандӯзӣ, атласу адрас, зардӯзӣ, ҷелакдӯзӣ ва тоқиҳои занонаву мардонаро аз худ намоянд.

Мақсад аз кушодани ин марказ дар ноҳияи дурдасти ҷумҳурӣ касбу ҳунаромузӣ барои бонувон буда, бо ин васила пайдо намудани ҷойи кори муносиб мебошад.

Дар расми кушодашавии «Маркази ҳунарҳои мардумӣ» дар ноҳияи Балҷувон муовини Раиси Ҳизби Халқии Демократии Тоҷикистон Хайринисо Юсуфӣ, муовини раиси ноҳия Маърифат Зоирзода, муовини Раиси КИ ҲХДТ дар вилояти Хатлон Наврӯз Ҳусейнзода, раиси КИ ҲХДТ дар ноҳия Исуф Мирзозода, масъулини мақомоти иҷроияи ҳокимияти давлатии ноҳияи Балҷувон, кормандони КИ ҲХДТ дар ноҳия, намояндагони воситаҳои ахбори омма ва дигарон ширкат доштанд.

Дар ҷараёни ифтитоҳи Маркази ҳунарҳои мардумӣ намоиши дастовези бонувони корманд ва маҳсули омодашуда пешкаш гардид. Дар марказ 30 нафар занони хонанишин дар ду баст соҳиби ҷойи кори доимӣ шуданд ва дар назар аст, ки барои омӯзонидани занону духтарони деҳаҳои дурдасти ноҳия курсҳо ташкил мегарданд. Бо дархости шуъбаи маорифи ноҳия марказ ба дӯхтани либосҳои мактабӣ шуруъ кардааст.

Бояд гуфт, ки чунин марказҳо аз ҷониби ҳизб аллакай дар шаҳру ноҳияҳои Ваҳдат, Хуҷанд, Ҳисор, Кӯшониён ва Нуробод ифтитоҳ шудаанд.

Маҳз ба шарофати сиёсати дурандешона ва фарҳангпарваронаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон ҳунарҳои қадимаи тоҷикон аз нав эҳёву барқарор гардида, нишондиҳандаи фарҳанги пурғановати халқи тоҷик мебошанд.

Бонувони кишвар имконият пайдо кардаанд, ки аз имтиёзҳои муқаррарнамудаи давлат ва ҳукумат истифода бурда, ҳунари аҷдодии худро рушд диҳанд ва зиндагии хешро пеш баранд.

Дар назар аст, ки чунин марказҳои ҳунаромӯзӣ бо дастгирии Ҳизби Халқии Демократии Тоҷикистон дар дигар шаҳру навоҳии дурдасти мамлакат низ ифтитоҳ гарданд.

АКСҲО: КИМ ҲХДТ

Ноябрь 1, 2021 16:22

Хабарҳои дигари ин бахш

Дар деҳаи Сангпари Ҷамоати деҳоти Зиракии шаҳри Кӯлоб Маркази хизматрасонӣ ва дорухонаи байтории замонавии «Рахш» ба истифода дода шуд
Дар Донишгоҳи давлатии Хуҷанд вобаста ба масъалаҳои мубрами назарӣ ва амалии фанҳои санъати тасвирӣ конференсияи ҷумҳуриявӣ доир шуд
Деҳаи Хуҷабулоқи ноҳияи Балҷувон соҳиби мактаби замонавӣ гардид
Дар деҳаи Қалъаи Лаби оби ноҳияи Тоҷикобод Маркази фарҳангӣ-фароғатӣ ба истифода дода шуд
35-СОЛАГИИ ИСТИҚЛОЛИ ДАВЛАТӢ. Дар шаҳри Ваҳдат бинои Маркази ташхиси санитарию эпидемиологӣ ба истифода дода мешавад
35-СОЛАГИИ ИСТИҚЛОЛИ ДАВЛАТӢ. Дар деҳаи Чорбоғи шаҳри Панҷакент бинои беморхонаи минтақавӣ сохта мешаванд
35-СОЛАГИИ ИСТИҚЛОЛИ ДАВЛАТӢ. Дар ноҳияи Рӯдакӣ Маркази ёрии таъҷилӣ бунёд мегардад
Дар ноҳияи Шаҳритус корҳои созандагиву бунёдкорӣ ба истиқболи 35-солагии Истиқлоли давлатӣ вусъат меёбанд
Дар ноҳияи Айнӣ бинои нави маъмурии кумитаи идораи замин ва корхонаи давлатии фаръии «Бақайдгирии молу мулки ғайриманқул» ифтитоҳ ёфт
ВУСЪАТИ БУНЁДИ ИНШООТИ СОҲАИ МАОРИФ. Дар ноҳияи Данғара биноҳои нави 3 муассисаи таҳсилоти миёнаи умумӣ мавриди истифода қарор дода шуд
Дар арафаи Рӯзи Парчами давлатӣ дар деҳаи Пшихарви ноҳияи Ванҷ бунгоҳи тиббӣ ба истифода дода шуд
35-СОЛАГИИ ИСТИҚЛОЛИ ДАВЛАТӢ. Дар Хуҷанд сохтмони 100 бинои баландошёнаи истиқоматӣ идома дорад