«ТОЛИБОН»* ДАР КОБУЛ ПАРАДИ ҲАРБӢ ДОИР КАРДАНД. Трамп инро «намоиши таассуфовар» номид

Ноябрь 18, 2021 12:06

ДУШАНБЕ, 18.11.2021 /АМИТ «Ховар»/. «Толибон»* рӯзи душанбеи 15 ноябр дар Кобул- пойтахти Афғонистон паради ҳарбӣ гузаронида, дар он таҷҳизоти мусодиранамудаи истеҳсоли Русия ва Амрикоро намоиш доданд. Тавре АМИТ «Ховар» хабар медиҳад, дар ин бора хабаргузории «Reuters» иттилоъ додааст.

Дар парад даҳҳо мошинҳои зиреҳпӯши амрикоии М117 иштирок доштанд. Онҳо аз роҳи асосии Кобул оҳиста-оҳиста ҳаракат карда, аз болои онҳо чархболҳои Ми-17-и Русия (намунаи содиротии Ми-8) парвоз мекарданд. Сарбозон бо автоматҳои амрикоии М4 мусаллаҳ буда, либоси камуфляжӣ доштанд, на либоси анъанавии толибон.

Муовини раиси вазорати дифои ҳукумати толибон Иноятуллоҳи Хоразмӣ гуфт, ки ин парад ба муносибати пурра шудани сафи артиш (толибон – тавзеҳи АМИТ «Ховар») бо 250 ҷангии навтаълим баргузор шуд.

«Reuters» менависад, ки толибон бо ин роҳ табдили худро аз як неруи шӯришӣ ба артиши муқаррарӣ бо таҷҳизоти низомӣ нишон доданд. Тайи бист соли охир онҳо  ҷангҳои партизанӣ мебурданд, аммо пас аз он ки Амрико моҳи августи соли ҷорӣ Афғонистонро тарк карда, таҷҳизоти низомии худро дар ин кишвар гузошт, он ба дасти толибон афтод.

Дар ҳамин ҳол, ба гузориши ТАСС, Доналд Трамп, раиси ҷумҳури пешини Амрико, намоиши таҷҳизоти низомии Амрико аз сӯи толибонро дар паради Кобул «намоиши таассуфовар» номид.

«Паради бузурги низомӣ, ки толибон баргузор карда, таҷҳизоти ба маблағи 85 миллиард доллар ба онҳо супурдаи амрикоиро нишон доданд, ба намоиши хеле ғамангезу таассуфовар табдил ёфт. Он тарзе, ки анҷоми хуруҷи неруҳо аз Афғонистон сурат гирифт- бузургтарин шармандагӣ дар таърихи кишвари мост», — гуфт ӯ рӯзи чаҳоршанбеи 17 ноябр дар иттилоияе, ки дафтари матбуоташ ба нашр расонидааст.

Дар дасти «Толибон» чӣ гуна техника монд

Тибқи маълумоти Бозрасии махсуси умумии ИМА оид ба барқарорсозии Афғонистон, аз соли 2002 то 2017 ИМА ба ҳукумати Кобул ба маблағи 28 миллиард доллар таҷҳизот, аз ҷумла силоҳ, муҳимот, дастгоҳҳои наззораи шабона, мошинҳо, ҳавопаймоҳо ва системаҳои назоратӣ интиқол додаанд.

Узви Конгресси ИМА Ҷим Бэнкс тасдиқ кард, ки толибон таҷҳизоти низомии амрикоиро ба маблағи 85 миллиард доллар мусодира кардаанд. Ҳанӯз моҳи август Бэнкс зикр карда буд, ки толибон ҳоло назар ба 85% давлатҳои дигари ҷаҳон бештар чархболҳои Black Hawk доранд.

Ҳангоми хуруҷи неруҳо амрикоиҳо тавонистанд 70 ҳавопаймо, даҳҳо зиреҳпӯшро нобуд кунанд ва системаҳои дифои ҳавоиро аз кор бароранд. Илова бар ин, 100 чархболи Ми-17-и сохти Русия дар Афғонистон боқӣ мондааст, гуфт роҳбари «Рособоронэкспорт» Александр Михеев ба Интерфакс.

Ҳодисаҳо дар Афғонистон метавонанд тибқи барномаи фалокатбор авҷ гиранд, агар мақомоти Кобул вазъро дар он ҷо ба эътидол оварда ва ҷомеаи ҷаҳонӣ аз мардум пуштибонӣ карда натавонанд. Дар ин бора дабири Шӯрои амнияти Русия Николай Патрушев 17 ноябр дар нишасти солонаи дабирони Шӯрои амнияти кишварҳои ИДМ дар Москва ҳушдор дод.

Бино ба суханони ӯ, ҳоло гуфтан душвор аст, ки ин барои минтақа, кишварҳои ИДМ ва дар маҷмӯъ барои тамоми ҷаҳон чӣ пайомадҳои эҳтимолӣ дошта метавонад. Вале онҳо ниҳоят манфӣ шуда метавонанд, гуфт котиби Шӯрои амният.

Илова бар ин, вай гуфт, ки Афғонистон набояд дубора ба майдони озмоиши моҷароҳои бемулоҳизаи геополитикии бозингарони беруна табдил ёбад, пешгирии ин- вазифаи ниҳоят муҳим аст. «Имрӯз барои мо беш аз ҳарвақта муттаҳид кардани саъю кӯшишҳо барои кори ҳамоҳангшуда ва созанда оид ба самти Афғонистон муҳим аст», — таъкид кард Патрушев.

_________________________________

* «Толибон» — созмони террористии мамнуъ дар Тоҷикистон ва сойири кишварҳо

                                               Фото:EPA /TASS

Ноябрь 18, 2021 12:06

Хабарҳои дигари ин бахш

САФ КАШЕМ АЗ ҲАМА ҶО БАҲРИ ДИФОЯТ, МЕҲАН. Эҳдо ба Рўзи Қувваҳои Мусаллаҳи Тоҷикистон
31 СОЛИ ПУР АЗ МАТОНАТУ ҶОННИСОРӢ. Хизматчиёни ҳарбии Қувваҳои Мусаллаҳи Тоҷикистон рисолати хешро дар назди давлат ва миллат сарбаландона иҷро мекунанд
АФСАРОНУ САРБОЗОНИ БОНАНГУ НОМУСИ ВАТАН –ИФТИХОРИ МО! Ҳифзи сарзамини аҷдодӣ вазифаи муқаддас аст
Дар Бадахшон занон-модарон ба дидорбинии фарзандон – сарбозони Ватан рафтанд
«ВАТАНПАРВАР». Дар Хатлон озмуни ҳарбӣ-ватандӯстӣ ҷамъбаст гардид
Дар ноҳияи Исмоили Сомонии пойтахт бахшида ба Рўзи Қувваҳои Мусаллаҳи Тоҷикистон ҳамоиши идона доир шуд
СИПОС БА МУҲОФИЗОНИ ВАТАН. Дар Донишкадаи давлатии фарҳанг ва санъати Тоҷикистон бахшида ба Рӯзи Қувваҳои Мусаллаҳ барномаи фарҳангӣ доир шуд
31-СОЛАГИИ ТАЪСИСИ ҚУВВАҲОИ МУСАЛЛАҲ. Сарбозони Ватан баҳри ҳифзу дифои ҳар пора замину ҳар зарра хоки Тоҷикистон ҷони худро дареғ намедоранд
Бахшида ба 31-солагии Қувваҳои Мусаллаҳи Тоҷикистон байни кормандони вазорату идораҳо мусобиқаҳои варзишӣ оғоз шуданд
Дар шаҳри Гулистон бахшида ба 31-солагии Қувваҳои Мусаллаҳ конференсияи илмӣ-амалӣ баргузор шуд
«ВАТАНПАРВАР». Дар Файзобод даври сеюми озмуни минтақавӣ гузаронида шуд
Бахшида ба Рӯзи Қувваҳои Мусаллаҳи Тоҷикистон бо афсарзанон ҳамоиш доир гардид