Истифодаи нодурусти доруҳои зиддимикробӣ ба саломатии аҳолӣ хатар дорад,- бардошт аз ҳамоиш

Ноябрь 19, 2021 15:25

ДУШАНБЕ, 19.11.2021 /АМИТ «Ховар»/. Имрӯз дар Муассисаи давлатии «Маркази ҷумҳуриявии ташаккули тарзи ҳаёти солим»-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бахшида ба Ҳафтаи ҷаҳонии истифодаи дурусти доруҳои зиддимикробӣ ҳамоиш доир гардид, хабар медиҳад мухбири АМИТ «Ховар».

Дар ҳамоиши мазкур намояндагони Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, Созмони ҷаҳонии тандурустӣ, Хадамоти назорати давлатии  тиббӣ, Маркази шаҳрии ташаккули тарзи хаёти солим  ва хабарнигорон иштирок намуданд.

Сардори Раёсати амнияти санитарию эпидемиологӣ,  ҳолатҳои фавқулода ва кумаки фаврии тиббии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Наврӯз Ҷафаров иброз дошт, ки мушкилоти устуворӣ ба доруҳои зиддимикробӣ дар Ҷумҳурии Тоҷикистон  аз масъалаҳои афзалиятноки соҳаи ҳифзи  саломатии аҳолӣ ва инчунин соҳаи кишоварзӣ  ба шумор меравад. Антибиотик дар соҳаи байторӣ низ васеъ истифода карда мешавад. Агар он танзими муайян надошта бошад, ҳассосияти худро гум мекунад.

“Истифодаи нодурусти доруҳои зиддимикробӣ барои саломатии аҳолӣ хатар дорад. Зеро бе тавсияи духтур истифодаи  антибиотикҳо устувории зиддимикробиро метезонад.

-Сироятҳое, ки аз микробҳои ба антибиотикҳо устувор ба вуҷуд омадаанд, дорои хусусияти  мураккаб буда, табобаташон душвор аст, — гуфт Наврӯз Ҷафаров.

Ба зикри директори Муассисаи давлатии “Маркази ҷумҳуриявии ташаккули тарзи ҳаёти солим” Парвина Мухторова, пеш аз истеъмоли доруҳои зиддимикробӣ бояд ҳатман бо табибон маслиҳат намуд. Зеро на ҳамаи сироятҳоро бо доруҳои зиддимикробӣ табобат кардан мумкин аст.

-Бояд гуфт, ки сироятҳои вирусӣ, ба монанди зуком бо антибиотикҳо табобат намешаванд. Аз ин рӯ пешгирии бемориҳои сироятӣ метавонад зарурати истифодаи доруҳои зиддимикробиро паст карда, паҳншавии тобовариро ба онҳо нигоҳ дорад. Риояи қоидаҳои одитарини гигиенӣ аз роҳҳои пурсамари кам кардани хавфи сироят маҳсуб мешавад,- гуфт директори Муассисаи давлатии “Маркази ҷумҳуриявии ташаккули тарзи ҳаёти солим”.

Ба андешаи намояндаи Созмони ҷаҳонии тандурустӣ дар Ҷумҳурии Тоҷикистон Хадичамо Бойматова, доруҳои зиддимикробӣ на ҳамеша мувофиқу муносиб ба шумор мераванд. Истифодаи ғайриоқилонаи доруҳои зиддимикробӣ метавонад дар бактерияҳо тобовариро ба амал орад. Пас мебояд пеш аз истеъмоли антибиотикҳо ҳатман бо духтур маслиҳат кард.

Бояд зикр намуд, ки  баргузории Ҳафтаи ҷаҳонии истифодаи дурусти доруҳои зиддимикробӣ  ба баланд бардоштани огоҳӣ дар бораи устуворӣ ба доруҳои зиддимикробӣ дар сатҳи миллӣ, баланд бардоштани сатҳи дониши мутахассисони соҳаи тиб ва таъмини дастрасии ҷомеа ба иттилооти дахлдори босифат оид ба доруҳои зиддимикробӣ ва истифодаи онҳо мусоидат менамояд.

Антибиотикҳо дар байни аҳолӣ бисъёр паҳншуда мебошанд. Аз ин рӯ ҳангоми табобати кӯдакон, занҳои ҳомила ва ширмакон истеъмоли доруҳои зиддимикробӣ тавсия дода намешавад. Зеро антибиотикҳо ба ҷанин ва кӯдак таъсири заҳрнокӣ мерасонанд.

Ёдовар мешавем, ки Ҳафтаи аврупоии истифодаи дурусти доруҳои зиддимикробӣ то 30 ноябр идома ёфта, дар доираи он баргузории ҳамоишҳои  омӯзишӣ дар муассисаҳои тандурустии вилояти Мухтори Кӯҳистони Бадахшон, вилоятҳои  Суғду Хатлон ва ноҳияи Рашт дар назар аст.

Холисаи АСОМИДДИН,
АМИТ «Ховар»

АКС: АМИТ «Ховар»

Ноябрь 19, 2021 15:25

Хабарҳои дигари ин бахш

Дар Раёсати Вазорати корҳои дохилӣ дар шаҳри Душанбе ярмарка-фурӯши маҳсулоти мавриди ниёзи аввал ташкил гардид
Ба иштирокчиёни ҷанг ва собиқадорони меҳнати ноҳияи Шаҳринав туҳфаҳо ва маводи хӯрокворӣ тақдим шуданд
Кумакҳои Пешвои миллат ба Мактаб-интернати ҷумҳуриявии кӯдакони ятим дар шаҳри Кӯлоб расонида шуданд
Имсол дар ҳудуди вилояти Хатлон 3 ҳолати фавқулодаи дорои хусусияти табиӣ ба қайд гирифта шуд
Аз номи Пешвои миллат ба хонандагони Мактаб-интернати ҷумҳуриявии сустшунавоёни ноҳияи Рӯдакӣ туҳфаҳои идона тақдим шуданд
Баландтарин афзоиши аҳолӣ пас аз пошхӯрии СССР дар Тоҷикистон ба қайд гирифта шуд
ОГОҲИИ АГЕНТИИ ОБУҲАВОШИНОСӢ. 28-29 декабр дар минтақаҳои алоҳидаи кӯҳии Тоҷикистон эҳтимоли фаромадани тарма дар назар аст
Бинои асосии Беморхонаи клиникавии шаҳрии ҷарроҳию табобатии №1-и Хуҷанд навсозӣ мегардад
Шӯрои собиқадорони вилояти Суғд барои дар рӯҳияи садоқат ба Ватан тарбия намудани ҷавонон мақоми шоиста дорад
Дар Тошканд Форуми ҷавонони Осиёи Марказӣ доир мешавад
Хуршед Зиёӣ: Паёми навбатии Сарвари давлат яке аз рамзҳои асосии давлатдории демократию ҳуқуқбунёд аст
Умеда Абдуллозода: Яке аз тадбирҳои баланд бардоштани мақоми зан дар ҷомеа ба тамоми зинаҳои таҳсил фаро гирифтани духтарон мебошад